22/10/2017
ئيشراق 441 جار بینراوە
وتووێژ تاکه چاره‌سه‌ره نه‌ک شڵه‌ژاندنی میدیایی
ڕه‌وشی که‌رکوک وه‌ک شارێکی کێشه له سه‌ر له نێوان هه‌رێمی کوردستان و حکومه‌تی ناوه‌ندی عێراق به ته‌نیا ده‌توانێت له ڕێگای وتووێژ و دانوستانه‌وه چاره‌سه‌ر بکرێت.
پاش ئه‌وه‌ی که به پێی ده‌ستوور، حکومه‌تی عێراق کۆنتڕۆڵی شاری که‌رکوکی کرد و هه‌وڵه‌کان به ئاراسته‌ی چاره‌سه‌ربوونی کێشه‌کان له لایه‌ن کۆمه‌ڵێک له عاقڵمه‌ندانی یه‌کێتی نیشتمانی کوردستانه‌وه به‌رده‌وامه، به داخه‌وه شه‌ڕێکی میدیایی له لایه‌ن که‌ناڵه‌کانی سه‌ر به لایه‌نێکی سیاسی به ئه‌نقه‌ست و به پلانێکی داڕێژراو که‌وتووه‌ته هه‌ڵمه‌تی شڵه‌ژاندنی دۆخی شاره‌که و ده‌یه‌وێت به هه‌ر شێوازێک ئاڵۆزی و بشێوی بنێته‌وه.
کرده‌وه‌ی چه‌ند ڕۆژی ڕابردووی ئه‌و که‌ناڵانه وای کردووه که مه‌ترسییه‌کی گه‌وره له سه‌ر ئاسایش و سه‌قامگیری هه‌رێمی کوردستان و عێراق بێت و به دڵنیاییه‌وه دۆخی له‌م شێوه‌یه خزمه‌ت به پێکه‌وه‌ژیانی پێکهاته‌کانی ئه‌م وڵاته ناکات.
ساڵه‌هایه پێکهاته‌کانی ناوچه کێشه له سه‌ره‌کان پێکه‌وه به گیانی برایه‌تی و ته‌بایی ژیان به سه‌ر ده‌به‌ن و گه‌ر حیزبه سیاسییه‌کان واز له‌وان بێنن هیچ کێشه و گرفتێک له نێوان ئه‌واندا نابێت.
له پاش ڕیفراندۆم و نه‌بوونی پاڵپشتی ناوخۆیی، عێراقی، ناوچه‌یی و نێوده‌وڵه‌تی بۆ بڕیاری تاکلایانه‌ی لایه‌نێکی سیاسی و کۆمه‌ڵه حیزبێکی نزیک له‌وان، هه‌وڵه‌کان بۆ شێواندنی دۆخی کوردستان و عێراق به‌رده‌وام بووه و ئه‌وه‌ش هه‌ڵمه‌تێکی هه‌ڵهاتنه له ڕاستییه‌کان.
بێ گومان وتووێژ و دانوستان تاکه چاره‌سه‌ری کێشه و گرفته‌کانی نێوان هه‌ولێر و به‌غدایه و سه‌رکردایه‌تی سیاسی کورد پێویسته هه‌وڵ بۆ چاره‌سه‌ربوونی ئه‌و کێشانه بدات نه‌ک میدیاکان وا به ئاراسته‌ی نانه‌وه‌ی ئاژاوه و بشێوه‌دا بڕۆن.
له ئێستادا که سه‌رۆک وه‌زیرانی عێراق و ئه‌نجومه‌نی وه‌زیرانی هه‌رێم پێشوازییان له دانوستان کردووه تاکه ڕێگای ئارامکردنه‌وه‌ی دۆخه‌که وه‌ستاندنی ئه‌و هه‌ڵمه‌ته میدیاییه‌ی چه‌ند که‌ناڵێکی دیاریکراوه. ئه‌و که‌ناڵانه خزمه‌ت به گه‌لی کورد ناکه‌ن و به پێچه‌وانه‌وه له ڕێگای خوڵقاندنی دوژمنایه‌تی له گه‌ڵ لایه‌نه ناوخۆییه‌کانی کوردستان، حکومه‌تی عێراق و وڵاتانی دیکه به ته‌نیا نه‌هامه‌تی بۆ ئه‌و خه‌ڵکه به شه‌ره‌فه ده‌خوڵقێنن. جام کوردی