17/10/2017
ئيشراق 605 جار بینراوە
که‌رکوک وه‌ک شاری پێکه‌وه‌ژیان
دۆخی شاری که‌رکوک وه‌ک شارێکی فره نه‌ته‌وه و مه‌زهه‌ب ئه‌وه ده‌خوازێت که هه‌وڵی به‌رده‌وام به مه‌به‌ستی پاراستنی ئاسایش و پێکه‌وه‌ژیانی ئاشتیانه‌ی ئه‌وان له ئارادا بێت. له پاش ڕووخانی ده‌سه‌ڵاتی به‌عس، هه‌ر دوو حکومه‌تی هه‌رێم و ناوه‌ندی له‌وه‌دا سه‌رکه‌وتوو نه‌بوون که به پێی پێویست کار بۆ هێنانه‌دی حه‌ز و خواستی ئه‌و خه‌ڵکه به هه‌موو پێکهاته‌کانه‌وه بکه‌ن. له سه‌رده‌می ده‌سه‌ڵاتی پێش 2014ی حکومه‌تی عێراق و پاشان له گرتنه ده‌ستی ئه‌و شاره له لایه‌ن هێزی پێشمه‌رگه‌ی کوردستان و زاڵبوونی کورد له ڕووی ئیداریشه‌وه، ڕه‌وتی ئاوه‌دانکردنه‌وه و خزمه‌تگوزارییه‌کان له‌م شاره ئه‌وه‌نده نه‌بووه که دانیشتووانی که‌رکوک هه‌ست به ئاسووده‌یی بکه‌ن، به‌ده‌ر له‌مه‌ش که‌رکوک هه‌رده‌م له دۆخێکی مه‌ترسیداری ئه‌منیدا بووه و هه‌ڕه‌شه‌ی له سه‌ر بووه، به‌ڵام ده‌بێت ڕۆڵی ئه‌و پێشمه‌رگانه‌ی که له ساڵانی هاتنی داعش به‌رگرییان له‌م شاره کردووه به‌رز بنرخێنین.
به گه‌رمبوونی باسی ڕیفراندۆم و پێداگری به‌رپرسانی پارتی دیمۆکراتی کوردستان به یاوه‌ری پارێزگار و سه‌رۆکی ئه‌نجومه‌نی پارێزگای که‌رکوک به وه‌کاله‌ت له سه‌ر به‌ڕێوه‌چوونی ئه‌و پرۆسه‌یه به بێ گرنگیدان به‌وه‌ی که که‌رکوک شارێکی کێشه له سه‌ره و به پێی ده‌ستووری عێراق ده‌سه‌ڵاتی ناوه‌ند شموولی ده‌کات، ڕه‌وشی که‌رکوک یان شاری ئاڵتوونه ڕه‌شه‌که ئاڵۆزتر بوو و ئاماژه‌کان له به‌غدا و هه‌ولێره‌وه ئه‌وه‌ی ده‌رده‌خست که ڕه‌نگه کێشه‌یه‌کی نوێ به‌رۆکی دانیشتووانی ئه‌م شاره بگرێته‌وه. هه‌ڵوێستی نابه‌رپرسانه و سه‌رتاپێ ئیحساسی هه‌ندێک له به‌رپرسانی کورد و بڕوابه‌خۆبوونێکی ڕاده‌به‌ده‌ر وای کرد که کورد نه گوێ له هه‌ڵوێسته ده‌ستوورییه‌کانی به‌غدا بگرێت و نه به لایه‌وه گرنگ بێت که کۆمه‌ڵگای نێوده‌وڵه‌تی و له سه‌رووی هه‌مووشیانه‌وه ئه‌مریکا چ پێشنیار و ئامۆژگارییه‌ک به کورد ده‌ده‌ن. لێره‌دا ده‌بێت ئاماژه به ڕۆڵی ڕاوێژکاره ناوخۆیی و بیانییه‌کانی به‌ڕێز مه‌سعود بارزانیش بدرێت که پاشهاته‌کانی به‌ڕێوه‌چوونی ڕیفراندۆم به گشتی و به تایبه‌ت له که‌رکوکیان ئه‌وه‌نده ڕوون نه‌کردووه‌ته‌وه که عێراق و هه‌رێمی کوردستانی به‌م دۆخه گه‌یاند.
ئێستاش ئه‌وه‌نده دۆخه‌که ڕووی له ئاڵۆزبوونی ئێجگار زۆر نه‌کردووه و ڕه‌نگه حکومه‌تی عێراقیش به حه‌لێکی مامناوه‌ند له گه‌ڵ هێزه کوردییه‌کانی که‌رکوک ڕزای ببێت. پێویسته کورد مێزی دانوستان وه‌ک تاکه ڕێگای گه‌ڕانه‌وه‌ی ئاشتی و ئارامی بۆ که‌رکوک هه‌ڵبژێرێت و واز له هه‌ندێک بیر و بڕوای بێ ده‌ره‌نجام بهێنێت. که‌رکوک ده‌بێت بۆ که‌رکوکییه‌کان بێت، ئه‌وان ده‌توانن داهاتووی ئه‌و شاره بپارێزن، هه‌ر هه‌نگاوێکی تاکلایانه چاره‌نووسی ئه‌وان ده‌خاته مه‌ترسییه‌وه، با ده‌رفه‌تی ژیان له‌وان تێک نه‌درێت و مامه‌ڵه‌یه‌کی ده‌ستوورییانه له گه‌ڵ که‌رکوک بکرێت. قبووڵی هه‌ڵه و شکست و هه‌وڵدان بۆ قه‌ره‌بووکردنه‌وه‌ی ڕه‌نگه له سه‌رکه‌وتن گرنگتر بێت، ئه‌گه‌ر به‌و ئاسته له سیاسه‌ت بگه‌ین!