28/08/2018
ئيشراق 485 جار بینراوە
تۆش ده‌ڕۆیت ...
گه‌لی ئێران هه‌ر له سه‌رده‌می هه‌ڵگیرسانی شۆڕشی ئیسلامی له دژی ده‌سه‌ڵاتی پاشایه‌تی ڕژێمی پاڵه‌وی به سیاسه‌تی دوژمنکارانه‌ی ویلایه‌ته یه‌کگرتووه‌کانی ئه‌مریکاوه ڕاهاتوو‌ن، له‌و سه‌رده‌مه‌دا که خرۆشی جه‌ماوه‌ری له ئێران له شه‌قام و شار و شارۆچکه‌کان ده‌بینرا، ئه‌مریکییه‌کان به‌و په‌ڕی پیلان و دوژمنایه‌تییه‌وه هه‌وڵی کپکردنی ده‌نگی خه‌ڵک و مانه‌وه‌ی ده‌سه‌ڵاتی پاڵه‌وییان ده‌دا به‌ڵام به ئیراده‌ی پۆڵایینی خه‌ڵک و ڕێبه‌رایه‌تی که‌م وێنه‌ی ئیمام خومه‌ینی (ره) شۆڕشه‌که به ئاکام گه‌یشت و له 22ی ڕێبه‌ندانی 1357ی کۆچی هه‌تاوی مێژوو لاپه‌ڕه‌یه‌کی نوێی بۆ ئێرانییه‌کان هه‌ڵدایه‌وه و ئه‌وه بوو که ئه‌وان بوونه خاوه‌نی ئیراده و وڵات و سه‌ربه‌خۆیی خۆیان.
ئه‌مریکا که به‌رژه‌وه‌ندییه‌کانی له ئێران نه‌مابوو له پاش سه‌رکه‌وتنی شۆڕشی ئیسلامی به ده‌یان پیلان هه‌وڵی شکستی ئه‌م شۆڕشه و هاتنه سه‌ر کاری ده‌سه‌ڵاتێکی نوێی به‌سراوه‌ی خۆی ده‌دا، ئه‌وه بوو که سه‌دامی تاوانباریان له دژی ئێران هاندا و شه‌ڕێکی هه‌شت ساڵه‌ی هه‌ڵگیرساند که به داخه‌وه بوو به هۆی گیان له ده‌ستدانی سه‌دان هه‌زار که‌س له دانیشتووانی هه‌ر دوو وڵات و زیانێکی مادی زۆریش به ژێرخانی ئێران و عێراقی ئه‌و سه‌رده‌مه گه‌یشت. به‌ڵام ئێرانییه‌کان بوێرانه پاڵپشتییان له شۆڕشی ئیسلامی کرد و له به‌رامبه‌ر دوژمنی به‌عسی و لایه‌نگرانی ناوچه‌یی و نێوده‌وڵه‌تی ئه‌م ڕژێمه سه‌رکه‌وتنیان به ده‌ست هێنا.
به شکستی پیلانی شه‌ڕی هه‌شت ساڵه‌ی به‌عس له دژی ئیران، ئه‌مریکا په‌نای بۆ سه‌پاندنی گه‌مارۆ ئابورییه‌کان هێنا، سه‌رۆک کۆمارانی ئه‌مریکا به‌رده‌وام دژ به ئێران خاوه‌نی سیاسه‌تێکی تایبه‌ت بوون که له دوژمنایه‌تی و هه‌وڵدان بۆ شکستی ده‌سه‌ڵاتی شۆڕشی ئیسلامی له ئێران خۆی ده‌بینێته‌وه، سیاسه‌تێک که هه‌ر له سه‌ره‌تای شۆڕسی ئیسلامی ئێرانه‌وه به یه‌ک ناوه‌ڕۆک و ئامانج به‌ڵام به ناوه جیاجیاکانه‌وه هه‌بووه و بێ گومان له داهاتووشدا به‌رده‌وام ده‌بێت.
له‌و کاته‌وه که جۆرج بۆشی کوڕ شه‌ڕی ئه‌فغانستانی ده‌ستپێکرد و پاشان هاته عێراق و ئه‌م وڵاته‌ی داگیر کرد به ڕاشکاوانه باسی ڕووخاندنی ده‌سه‌ڵاتی ئێرانی ده‌کرد، به‌ڵام ئه‌وه‌ی که بینرا شکستی پیلانه‌کانی ئه‌مریکا له ناوچه‌که بووه، له ئه‌فغانستان سه‌ره‌ڕای تێچوویه‌کی زۆر هێشتا ئه‌مریکا له جێگیربوونی ئاسایش و سه‌قامگیری ئه‌م وڵاته سه‌رکه‌وتوو نه‌بووه و دانیشتووانی ئه‌فغانستان له کێشه ئه‌منی و ئابورییه‌کانی وڵاته‌که‌یان وه‌ڕه‌زبوون و ئه‌مریکاش به هۆکاری سه‌ره‌کی ئه‌م دۆخه ده‌زانن. عێراق و 15 ساڵ پاش هاتنی ئه‌مریکییه‌کان باشترین به‌ڵگه‌یه بۆ شکستی سیاسه‌ته‌کانی ئه‌مریکا و ده‌بینین که به‌رهه‌می دیمۆکراسی بانگه‌شه‌کراوی کۆشکی سپی چ کێشه و گرفتێکی بۆ عێراقییه‌کان خوڵقاندووه.
هه‌ر له سه‌رده‌می باراک ئۆباماش به سه‌پاندنی سزا ئابورییه‌کان ئه‌مریکا هه‌وڵی دژایه‌تی کۆماری ئیسلامی ئێرانی ده‌دا به‌ڵام دیپلۆماسیه‌تی سه‌رکه‌وتووی تاران له سه‌ر ئاستی نێوده‌وڵه‌تی بوو به هۆی ملکه‌چبوونی ده‌سه‌ڵاتدارانی واشنتن و ڕێکه‌وتنی ناوه‌کی وه‌ک ده‌سکه‌وتێکی گه‌وره بۆ ئێران واژۆ کرا و ئێستاش پاش کشانه‌وه‌ی ئه‌مریکا له‌م ڕێکه‌وتنه نێوده‌وڵه‌تییه هێشتا زلهێزه‌کانی دیکه ڕێزی لێده‌گرن و له به‌رامبه‌ر ئه‌مریکای تره‌مپ وه‌ستاونه‌ته‌وه.
تره‌مپ و ئیداره‌که‌ی ئێستا به ناوێکی دیکه‌وه هاتوون که دژایه‌تی ئێران بکه‌ن، پێکهێنانی گرووپی کار له دژی ئێران، به‌ڵام ئه‌مه هه‌مان سیاسه‌تی شکستخواردووی سه‌رده‌می بۆش و ئۆباما و ئه‌وانی دیکه‌یه. بێ گومان تره‌مپیش له‌م هاشوهوشه‌ی هیچ ده‌سکه‌وتێکی نابێت و وه‌ک ئه‌وانی دیکه کۆشکی سپی به جێ دێڵێت و ئێران و ئێرانییه‌کان به سه‌ربه‌رزی ده‌مێننه‌وه.
س/جام کوردی