07/07/2018
ئيشراق 686 جار بینراوە
نه‌وتی ئێران به‌رده‌وام هه‌نارده ده‌کرێت
پاش کۆبوونه‌وه‌ی لێژنه‌ی هاوبه‌شی ڕێکه‌وتنی ناوه‌کی، یه‌کێتی ئه‌ورووپا به‌یاننامه‌یه‌کی بڵاو کرده‌وه.
یه‌کێتی ئه‌ورووپا پاش کۆتایی هاتنی کۆبوونه‌وه‌ی لێژنه‌ی هاوبه‌شی ڕێکه‌وتنی ناوه‌کی، یه‌کێتی ئه‌ورووپا به‌یاننامه‌یه‌کی به‌م شێوازه بڵاو کرده‌وه.
1- له سه‌ر داوای کۆماری ئیسلامی ئێران، کۆبوونه‌وه‌ی لێژنه‌ی هاوبه‌شی ڕێکه‌وتنی ناوه‌کی له ئاستی وه‌زیران له به‌رواری 6ی جولای له شاری ڤییه‌نا به‌ڕێوه‌چوو. لێژنه‌ی هاوبه‌ش به مه‌به‌ستی وتووێژی تایبه‌ت به‌م قۆناغه و بۆ دڵنیایی له به‌رده‌وامبوونی ڕێکه‌وتنه‌که پاش کشانه‌وه‌ی تاکلایانه‌ی ئه‌مریکا، به‌ڕێوه‌چوو.
2- لێژنه‌ی هاوبه‌ش به‌رپرسی چاودێری جێبه‌جێکردنی ڕێکه‌وتنی ناوه‌کییه.
3- لێژنه‌ی هاوبه‌ش به سه‌رۆکایه‌تی فدریکا موگرینی به‌رپرسی سیاسه‌تی ده‌ره‌وه‌ی یه‌کێتی ئه‌ورووپا و به ئاماده‌بوونی وانگ یی وه‌زیری ده‌ره‌وه‌ی چین، ژان ئیۆ لۆدریان وه‌زیری ده‌ره‌وه‌ی فه‌ره‌نسا، هایکۆ ماس وه‌زیری ده‌ره‌وه‌ی ئه‌ڵمانیا، سرگێی کاوڕۆڤ وه‌زیری ده‌ره‌وه‌ی ڕووسیا، ئالیستر برت وه‌زیری ده‌ره‌وه‌ی به‌ریتانیا و محه‌ممه‌د جه‌واد زه‌ریف وه‌زیری ده‌ره‌وه‌ی ئێران به‌ڕێوه‌چوو.
4- ئه‌ندامانی لێژنه‌ی هاوبه‌شی ڕێکه‌وتنی ناوه‌کی جارێکی دیکه جه‌ختیان له سه‌ر به‌ڵێنه‌کانی خۆیان سه‌باره‌ت به جێبه‌جێکردنی ڕێکه‌وتنه‌که کرده‌وه. ئه‌وان ڕوونیان کرده‌وه که ڕێکه‌وتنی ناوه‌کی ڕۆڵی گرنگی له سه‌ر ئاستی جیهانی هه‌بووه و ده‌سکه‌وتێکی گرنگی دیپلۆماسیه‌تی جیهانییه که به پێی بڕیاری ژماره 2231ی ئه‌نجومه‌نی ئاسایش به کۆده‌نگی سه‌رجه‌م ئه‌ندامان په‌سه‌ند کرا. ئه‌ندامانی ڕێکه‌وتنی ناوه‌کی خۆشحاڵی و ڕه‌زامه‌ندی خۆیان له یانزه‌یه‌مین ڕاپۆرتی ئاژانسی نێوده‌وڵه‌تی وزه‌ی ناوه‌کی ده‌ربڕیوه که جارێکی دیکه جه‌خت له سه‌ر پابه‌ندبوونی ئێران به به‌ڵێنه‌کانی ده‌کاته‌وه.
5- سه‌رجه‌م لایه‌نه‌کان جه‌ختیان له سه‌ر پێویستی جێبه‌جێکردنی ته‌واو و کاریگه‌ری بڕگه‌کانی ڕێکه‌وتنی ناوه‌کی کرده‌وه. ئه‌وان له پێشکه‌وتنه به‌رده‌وامه‌کان سه‌باره‌ت به نۆژه‌نکردنه‌وه‌ی ناوه‌ندی توێژینه‌وه‌یی ئه‌راک پێشوازییان کرد و له‌وه‌ی که ئه‌رکی سه‌رپه‌رشتیاری گرووپی چاودێری ئه‌راک به به‌ریتانیا دراوه، خۆشحاڵی خۆیان ده‌ربڕیوه. لایه‌نه‌کانی ڕێکه‌وتنی ناوه‌کی درێژه به پاڵپشتی خۆیان بۆ نۆژه‌نکردنه‌وه‌ی ناوه‌ندی توێژینه‌وه‌یی ئه‌راک وه‌ک به‌شێک له ڕێکه‌وتنی ناوه‌کی و گۆڕینی ناوه‌ندی فۆردۆ به ناوه‌ندێکی ناوه‌کی، فیزیا و ته‌کنۆلۆژیا ده‌ده‌ن. لایه‌نه‌کان هه‌روه‌ها له پرۆژه گرنگه‌کانی پاشکۆی ڕێکه‌وتنی ناوه‌کی سه‌باره‌ت به چالاکی ئاشتیخوازانه‌ی ناوه‌کی پێشوازییان کردووه.
6- به‌شداربووان جه‌ختیان کردووه‌ته‌وه که له به‌رامبه‌ر جێبه‌جێکردنی به‌ڵێنه‌کانی هاوپه‌یوه‌ند له گه‌ڵ ڕێکه‌وتنی ناوه‌کی ئێران، هه‌ڵگرتنی گه‌مارۆکان، به تایبه‌ت به‌رژه‌وه‌ندییه ئابورییه‌کان، به‌شێکی جیانه‌کراوی ڕێکه‌وتنی ناوه‌کییه. ئه‌وان هه‌روه‌ها گرنگییان به‌م خاڵه داوه که لایه‌نه ئابورییه‌کان که هه‌وڵی چالاکی یاساییان له گه‌ڵ ئێران داوه، به پێی بڕگه‌کانی ڕێکه‌وتنی ناوه‌کی هه‌نگاویان ناوه.
7- به‌شداربووان سه‌باره‌ت به ڕێکاره کردارییه‌کانی ئاساییبوونه‌وه‌ی په‌یوه‌ندی ئابوری و بازرگانی له گه‌ڵ ئێران دانوستانیان کردووه. ئه‌وان وێڕای پێشوازی له هه‌نگاوه‌کانی پێشوو، به‌رده‌وامی وتووێژه‌کانیان به پێویست ناو بردووه.
8- له خاڵی هه‌شته‌مدا هاتووه که به‌شداربووان به‌ڵێنی خۆیان سه‌باره‌ت به چه‌ندین بڕگه دووپات کردووه‌ته‌وه:
پاراستن و به‌رزکردنه‌وه‌ی ئاستی په‌یوه‌ندییه ئابورییه‌کان له به‌شه جیاجیاکان له گه‌ڵ ئێران
پاراستن و به‌رزکردنه‌وه‌ی که‌ناڵه‌کانی په‌یوه‌ندی دارایی له گه‌ڵ ئێران
به‌رده‌وامی هه‌نارده‌ی نه‌وت و به‌رهه‌مه‌کانی نه‌وتی و پترۆکیمیای ئێران
به‌رده‌وامی په‌یوه‌ندی گواستنه‌وه‌ی ده‌ریایی، ئاسمانی، وشکانی و ئاسن
ئاسانکاری له به‌شی هه‌نارده‌کاری
پاڵپشتی ئاشکرا و کاریگه‌ر له چالاکوانانی ئابوری که په‌یوه‌ندییان له گه‌ڵ ئێران هه‌یه به تایبه‌ت کۆمپانیا بچووک و مامناوه‌نده‌کان که ئه‌ستوونی سه‌ره‌کی به‌شێک له ئابورییه‌کان هه‌ژمار ده‌کرێن
هاندانی سه‌رمایه‌گوزاران بۆ چالاکی زیاتر له ئێران
پاڵپشتی له چالاکییه ئابورییه‌کان بۆ سه‌رمایه‌گوزاری و چالاکییه‌کانی دیکه‌ی هاوپه‌یوه‌ندی دارایی و بازرگانی له ئێران یان په‌یوه‌ندیدار به‌م وڵاته‌وه
پاڵپشتی له کۆمپانیاکان له به‌رامبه‌ر گه‌مارۆکانی ئه‌مریکا له دژی ئێران
9- به‌شداربووان وه‌بیری دێننه‌وه که ئه‌م هه‌نگاوانه به ئامانجی پاراستنی ڕێکه‌وتنی ناوه‌کییه که له پێناو به‌رژه‌وه‌ندییه ئه‌منییه‌کان ده‌کرێت.
10- لایه‌نه‌کانی به‌شداربووی لێژنه‌ی هاوبه‌شی ڕێکه‌وتنی ناوه‌کی ڕه‌زامه‌ندییان له سه‌ر ئه‌وه ده‌ربڕیوه که درێژه به هاوکارییه‌کانی نێوانیان له سه‌ر ئاستی وه‌زیران ده‌ده‌ن. هه‌روه‌ها جه‌ختیان له جێبه‌جێکردنی سه‌رجه‌م بڕگه‌کانی کۆبوونه‌وه‌که‌ی ڤییه‌نا به ئامانجی پاراستنی ڕێکه‌وتنی ناوه‌کی به تایبه‌ت پاش کشانه‌وه‌ی ئه‌مریکا کردووه‌ته‌وه.
س/جام کوردی