10/12/2018
ئيشراق 614 جار بینراوە
هیوایه‌گ ئه‌راى چاره‌سه‌ركردنى کێشه‌يلى هه‌ولێر و به‌غدا
ئه‌و گۆڕانکارییانه‌ی که له پرۆسه‌ی سیاسی عێراق پاش به‌ڕێوه‌چوونی هه‌ڵبژاردنه په‌رله‌مانییه‌که‌ی ئه‌م وڵاته بینرا، سه‌ره‌ڕای هه‌موو ئه‌و کێشه و گرفتانه‌ی که هێشتا ئازاری کابینه‌که‌ی عادڵ عه‌بدولمه‌هدی ده‌دات به‌ڵام هیوایه‌کی بۆ چاره‌سه‌ربوونی کێشه‌کانی نێوان هه‌ولێر و به‌غدای پێوه ده‌بینرێت.
هه‌ر دوو حکومه‌تی هه‌رێمی کوردستان و ناوه‌ندی عێراق کۆمه‌ڵه کێشه و گرفتێکی که‌ڵه‌که‌بوو له نێوانیاندا هه‌یه که ده‌یان سه‌ردان و کۆبوونه‌وه‌ی به‌رپرسانی باڵای هه‌ر دوو لا له خوله‌کانی ڕابردوو له‌وه‌دا سه‌رکه‌وتوو نه‌بووه کۆتایی به‌م دۆخه‌ی په‌یوه‌ندییه‌کانی نێوانیان بێنێت.
به هه‌ڵبژاردنه په‌رله‌مانییه‌که‌ی عێراق و پێکهێنانی کابینه‌ی نوێی ئه‌م وڵاته له لایه‌ن که‌سێکه‌وه که جێی متمانه و قبووڵکراوی سه‌رجه‌م لایه‌نه سیاسییه‌کانی عێراقه، چه‌شنێک له هیواداری بۆ تێپه‌ڕاندنی ئه‌م وڵاته له قه‌یرانه‌کان ده‌بینرێت، یه‌ک له‌و قه‌یرانانه‌ش دۆخی په‌یوه‌ندییه‌کانی نێوان هه‌ولێر و به‌غدایه که به هه‌ڕه‌شه‌یه‌کی جیدی له سه‌ر یه‌کگرتوویی عێراقیش داده‌نرێت.
وه‌ک خوله‌کانی ڕابردووی عێراق، سه‌رۆکێکی کورد پاڵی به کورسییه‌که‌ی کۆشکی سه‌لامه‌وه داوه، ئه‌و که‌سێکه که له هه‌مان سه‌ره‌تای گه‌یشتنی به پۆستی سه‌رۆک کۆماری عێراق جوڵه‌یه‌کی به‌رچاوی له سه‌ر ئاستی ناوخۆیی و نێوده‌وڵه‌تی پێوه بینرا و چاودێرانی سیاسی باس له پێگه و کاریگه‌ری ناوبراو له‌و پۆسته‌دا ده‌که‌ن و گه‌شبینن که بوونی به‌رهه‌م ساڵح ببێته هانده‌ری گه‌ڕانه‌وه‌ی پێگه‌ی عێراق له هه‌ر دوو ئاستی ناوخۆیی و نێوده‌وڵه‌تی.
یه‌کێکی دیکه له خاڵه گرنگه‌کانی تایبه‌ت به‌م خوله‌ی پرۆسه‌ی سیاسی عێراق، پشتگیری مه‌سعود بارزانی سه‌رۆکی پارتی دیمۆکراتی کوردستانه بۆ عادڵ عه‌بدولمه‌هدی و به‌شداری کارای ئه‌م حیزبه‌یه له پێکهاته‌ی کابینه‌ی نوێی عێراق. پارتی پۆستی جێگری سه‌رۆک وه‌زیران و وه‌زیری دارایی و جێگری سه‌رۆکی په‌رله‌مانی و وه‌زاره‌تی دیکه‌ی هه‌یه و به فراکسیۆنێکی 25 کورسییه‌وه ڕۆڵی گرنگی له په‌رله‌مانی عێراقدا ده‌بێت.
سه‌ردانه‌که‌ی مه‌سعود بارزانی بۆ به‌غدا و پێشوازی گه‌رمی به‌رپرسانی باڵای عێراق و لایه‌نه سیاسییه‌کانی ئه‌م وڵاته له ناوبراو خاڵی گرنگ و هانده‌ری چاره‌سه‌ربوونی کێشه‌کانی نێوان هه‌ولێر و به‌غدایه. ئیراده‌ی چاره‌سه‌ربوونی کێشه‌کانی نێوان هه‌رێم و ناوه‌ند لای هه‌ر دوو حیزبی سه‌ره‌کی کوردستان واته پارتی و یه‌کێتی له گه‌ڵ حکومه‌تی ناوه‌ندی عێراق هه‌یه و سه‌رۆک وه‌زیرانیش له قۆناغه جیاجیاکانی ژیانی سیاسی خۆیدا خاوه‌ن په‌یوه‌ندییه‌کی به‌هێزه له گه‌ڵ سه‌رکرده‌کانی ئه‌م دوو حیزبه و پێده‌چێت به‌راورد به خوله‌کانی ڕابردوو باسکردن له چاره‌سه‌ربوونی کێشه‌کان زۆر ئاسانتر بێت.
ئه‌وه‌ی که له کۆبوونه‌وه‌کانی بارزانی و به‌رپرسانی باڵای حکومه‌ت و لایه‌نه سیاسییه‌کانی عێراق له به‌غدا و نه‌جه‌ف بینرا، گوزارشت له‌وه ده‌کات که له‌م که‌شه سیاسییه‌ی ئێستای عێراق هه‌نگاوه‌کان بۆ چاره‌سه‌ربوونی کێشه‌کان چڕتر ده‌بنه‌وه، به تایبه‌ت پاش ئه‌وه‌ی که هه‌ر دوو حکومه‌تی هه‌رێم و ناوه‌ند به‌و ڕاستییه گه‌یشتوون که پێویستیان به یه‌کتر هه‌یه.
له هه‌رێمی کوردستانیش گۆڕانکاری گه‌وره ڕووی داوه. پارتی دیمۆکراتی کوردستان وه‌ک حیزبی یه‌که‌می هه‌ڵبژاردنه‌کان، که‌سێکی نوێی بۆ سه‌رۆکایه‌تی ئه‌نجومه‌نی وه‌زیران ده‌ستنیشان کردووه. کاندیدکردنی مه‌سرور بارزانی له لایه‌ن ئه‌نجومه‌نی سه‌رکردایه‌تی پارتی دیمۆکراتی کوردستانه‌وه پیشانده‌ری ئه‌وه‌یه که ناوبراو درێژه‌پێده‌ری سیاسه‌ته‌کانی باوکیه و ئه‌و سیاسه‌ته‌ی که بارزانی باوک له به‌غداوه جه‌ختی له سه‌ر کرده‌وه، مزگێنی وه‌رزێکی نوێی په‌یوه‌ندییه‌کانی هه‌ولێر و به‌غدا ده‌دات، به تایبه‌ت ئه‌وه‌ی که یه‌کێتی نیشتمانی کوردستانیش وه‌ک هێزی دیکه‌ی گه‌وره‌ی هه‌رێمی کوردستان هه‌ر له مێژه سیاسه‌تی باشترکردنی په‌یوه‌ندییه‌کانی له گه‌ڵ ناوه‌ند داڕشتووه و سه‌رۆک کۆماره‌که‌ش له‌و حیزبه‌یه که خۆی لایه‌نگری بوونی په‌یوه‌ندییه‌کی به‌هێزی نێوان کورد و ناوه‌نده. له بیرمان نه‌چێت که عادڵ عه‌بدولمه‌هدیش له گه‌ڵ سه‌رۆک وه‌زیرانی پێشووی عێراق جیاوازی زۆری هه‌یه.
س/جام کوردی