15/03/2018
ئيشراق 633 جار بینراوە
بژارده‌ى عراقيه‌يل له هه‌ڵوژاردنه‌يل
ئويشن ئه‌گه‌ر حكومه‌ت گه‌ناته‌كار بووگ ئه‌وه له‌ئاكام كومه‌ڵگايگ گه‌ناته‌كاره، ئه‌گه‌ريش كومه‌ڵگا گه‌ناته‌كار بووگ حكومه‌ت گه‌ناته‌كار له‌لى كه‌فيگه‌و، ئه‌ى دى چوين له‌بان بنه‌ماى گه‌ناته‌كارى بووسيه‌يم؟! ئايا ها كومه‌ڵگا يا حكومه‌ت يا هه‌ردوگيان وه‌يه‌كه‌و؟!
وه ئه‌وه‌يش ئيمه هايمنه وه‌رده‌م جه‌ده‌ليه‌يگ ناودار خايه له مامره يا مار له خايه‌س، له‌بان ئى پێوه‌ريشه تويه‌نيم بويشيم(حكومه‌ت گه‌ناته‌كار له كومه‌ڵگاى كه‌ناته‌كاره‌و په‌يا بووگ، يا كۆمه‌ڵگاى گه‌ناته‌كار له حكومه‌ت گه‌ناته‌كاره)، وه‌لێ له‌يرا ميراتيگ تاريخى هه‌س، حكومه‌ت ئيمام عه‌لى(ع) عه‌داڵه‌ت بوى له‌ساێ كۆمه‌ڵگاى كه‌ناته‌كار.
له‌يرا پرسياره‌يليگ موهم ده‌ركه‌فيگ و هه‌وه‌جه وه جواودانه‌وه ديرن، كه ئه‌ويش ئه‌وه‌سه ئه‌راچه گه‌ناته‌كاره‌يل له عراق هه‌ڵوژاردنيان دوباره‌وه كريه‌يگ له خوله‌يل هه‌ڵوژاردن له‌بان هساو كه‌سه‌يل پاك و كه‌فائه‌تدار؟ گه‌ناته‌كاره‌يل گره‌و له‌بان چه كه‌ن؟ كى ئى قه‌وڵه جيوه‌جى كه‌يگ كه ئويشيگ تاقيكه‌ر تاقيه‌و نيه‌كه‌يگ؟!
جواويش وه ئاشكرا ئه‌وه‌سه كه ده‌نگده‌ر له عراق كانديديگ ده‌سپاك نيه‌توايگ كه راسگوويى داشتووگ و ئه‌مين بووگ و وه‌رپرسيارێتى نيشتمانىى و شه‌رعيه بگرێگه مل، به‌ڵكوو كانديديگ توايگ تواناى درووكردن و مراوغه‌و وازيكردن وه ياسايه‌يل داشتووگ.
موسيبه‌ت ملله‌ت عراقى ئه‌وه‌سه كه قسه نيه‌كه‌يگ و نيه‌دوينيگ و نيه‌ژنه‌فيگ و هه‌ر له‌وه‌ر ئه‌وه‌يش گه‌ناته‌كاره‌يل ترس له‌ليان نه‌يرن و له هه‌مان وه‌خت فراكسيۆنه‌يل سياسييش زه‌مانه‌ت ده‌سكه‌فت و پۆسته‌يل ئه‌را سياسيه‌يل ناتوانا كه‌ن و دى ته‌ماشا كه‌ێد چ نوێنه‌ره‌يل يا وه‌زيره‌يل له پۆسته‌يليان مينن تا مردن و نموونه‌يش له‌بان ئى فره‌س وه‌لى نيه‌توايم ناو كه‌سيگ باريم.
ئايا نيه‌دوينين كه زوورم په‌رله‌مانتاره‌يل وه‌رين جاريگتر له تازه‌وه خوه‌يان كانديد كردنه، هه‌ر له‌وه‌ر ئه‌وه‌يش هيزه‌يل سياسى له عراق نيه‌توان ده‌سكه‌فت و پۆسته‌يليان له‌ده‌س بيه‌ن و جه‌نگ له‌وه‌ر ته‌ئمينكردن كورسيه‌يل سياسييان كه‌ن و مكوڕن له‌بان مه‌ندنه‌وه‌ى نوێنه‌ره‌يل و وه‌زيره‌يليان تا دويا هه‌ناسه.
راجي العوادي