28/02/2018
ئيشراق 552 جار بینراوە
هه‌ڵوژاردنه‌يل عراقى.. ركابه‌رى يا كيشمه‌كيش؟؟!!
ئه‌وه‌گ روى ده‌يگ له ئاماده‌كاريه‌يل ئه‌را هه‌ڵوژاردنه‌يل عراقى له‌ناونى كانديده‌يل و هه‌ڵمه‌ته‌يل سه‌خب و يه‌كشكانن، چووگه بازنه‌ى كيشمه‌كيش ناونى لايه‌نه‌يل سياسى و هيزه به‌شداربويه‌گه‌ى، شايه‌ت بڕه‌سيگه كيشمه‌كيش له‌ناونيان تاڕاده‌يگ شكانن شقانن و يه‌كترى خستن وه چاڵ و خوينڕشانن ئه‌وانه‌گ له‌بان دژايه‌تى هساو بكريه‌ن.
وه‌لێ ركابه‌رى له ده‌وڵه‌ته‌يل دونيا له‌ناونى هيزه‌يل سه‌ره‌كى روێ ده‌يگ ك به‌شدارى له ده‌سڵات كه‌ن، دى كيشمه‌كيش له‌ناونيان مينيگ له چوارچيوه‌ى(ركابه‌رى له‌بان خاستر پيشكه‌شكردن)و خزمه‌ت كۆمه‌ڵگايه‌يلێ و بنياتناين بنه‌مايه‌يل ده‌وڵه‌ت و پله‌و پايه‌ى و پيشخستن وڵاته‌يليان.
وه‌لێ عراقيه‌يل و فره‌يگ له سياسيه‌يليان هانه بان ئه‌و ئاوازه كه بيجگه زووان كيمشه‌كيش چشتيگ ترنيه‌زانن و تاڕاده‌يگ كه بڕه‌سێده وه‌كارهاوردن گشت ريه‌يل خراويگ ئه‌را شكانن يه‌كترى و كاركردن له‌بان لاوردنى له‌ڕێ، دى چ ئه‌وانه‌گ وه‌ليانا به‌شدارى بكه‌ن له روى وه‌ڕوى بوينه‌وه يا هيزه‌يل تر ك دوشنه‌يليان وه لايه‌نيگ تر زاننه‌يان له روى وه‌ڕوى بوينه‌وه!!.
ئنجا ئه‌گه‌ر ته‌فرنج بيه‌يم دوينيم به‌رژه‌وه‌ندى عراق و مافه‌يل ئاداميزاد و هويركردن له بنياتناين بنه‌ما و بنه‌ڕه‌ته‌يل ده‌وڵه‌ت له ئه‌وله‌ويات نيه، به‌ڵكوو له هه‌ر ئه‌هميه‌ته‌يل تريش نيه ك سياسيه‌يل دروشمه‌يلى وه ساخته‌و دروو به‌رزه‌و كه‌ن، چوينكه ئه‌وانه هويچ چشتيگ گرينگ نيه له‌لايان ته‌نيا سه‌ركه‌فتن خوه‌يان نه‌وگ، به‌ڵكوو ته‌نانه‌ت پيلانيش له‌بان كه‌سه‌يل نزيك له خوه‌يانيش دروس كه‌ن ئه‌گه‌ر هه‌وه‌جه بكه‌يگ.
هه‌ر له‌وه‌ر ئه‌وه‌يش دوينيم عراق ئه‌را ماوه‌ى فريگ ته‌نيا زه‌ره‌دمه‌نه له‌گشت ئه‌و كيشه‌و گرفت و كاره‌يله و هه‌ڵوژاردنه‌يليش نيزيكه‌و بويه‌و ئه‌نجامه‌يلى ده‌ركه‌فيگ و هه‌ر خود ئه‌وانه سه‌ركه‌فن كه له خول وه‌رين بوينه و جاريگ تر تيه‌نه‌و ئه‌را نوێنه‌رايه‌تى و ته‌نيا مه‌ردم كه‌ميگ تيه‌ن كه تازه بوون و ئه‌وانيش تواناى ئه‌وه نه‌يرن چشتيگ ئه‌نجام بيه‌ن، چوينكه فراكسيۆنه‌يل سياسى هه‌ر مينن و كيشمه‌كيش وه‌رده‌وام مينيگ له‌ناونيان و وه‌هاوكارى وه‌ل لايه‌نه‌يل هه‌رێمى و ناوده‌وڵه‌تى مينن و حوكم كه‌سه‌يل به‌دبه‌خت كه‌ن ئه‌را رووژگاره‌يليگ!!
حامد شهاب