11/02/2018
ئيشراق 687 جار بینراوە
٢٢ڕێبەندان، ڕووژ نیشتمانی ئيرانيه‌يل
22 رێبه‌ندان جوور رووژ سه‌ركه‌فتن شۆرش ئسلامى ئيرانى له‌ساڵ 1357 كووچى هه‌تاوى وه رووژ نيشتمانى دانريه‌ێگ، رووژيگ كه مه‌ردم وڵات كووتايى وه يه‌كيگ له دڕنده‌ترين رژيمه‌يل ناوچه‌كه هاوردن، رژيميگ كه وه‌رانوه‌ر وه مه‌ردم ته‌نيا پشت وه وڵاته‌يل بيگانه وه‌تايبه‌ت ئه‌مريكا به‌ساوێد، وه‌لێ هيز ملله‌ت ده‌رئه‌نجام سه‌ركه‌فتتن له‌بان هيز سه‌ربازى رژيم شاو ئه‌مريكاى پشتگيرى هاوردن.
وڵاته‌يل گه‌وراهيز هه‌ر له سه‌ره‌تاى شۆرش ئسلامى ئيرانه‌و خه‌و له‌ناوبردن و رمانن ئى شۆرشه دوينستيان و وه چه‌سپانن چه‌نگ و گه‌مارۆ و سزاى ئابوورى مه‌يل شكه‌شت شۆڕش ئسلامى داشتن، وه‌لێ مه‌ردم جه‌هان ئه‌وه دين كه شۆڕش ئسلامى هه‌ر مه‌ند و رووژ له‌دوياى رووژ وه‌هيزتر بوى له‌بان ئاست ناوچه‌گه‌و جيهان و دريژه دا ته‌مه‌ن پڕ شانازى خوه‌ى.
رابه‌رايه‌تى ئيمام خومه‌ينى(ره)و دوياى ئه‌وه‌يش حه‌زره‌ت ئايه‌توڵڵا خامه‌نه‌يى له ماوه‌ى چوار ده‌يه‌ى گوزه‌يشت سه‌رجه‌م پيلان دوژمنه‌يل پويچه‌ڵ كرده‌سه‌وه‌و مه‌ردميش ئاماده‌ى مه‌يدان وه‌رگرى بوين له ئيران ئسلامى و ده‌رفه‌ت ئه‌وه‌يش نه‌يان كه دوژمنه‌يل ئسلام و ئيران زه‌ره‌د وه‌ى شۆرشه بڕه‌سنن. ئمڕوو ئيران ئسلامى وه‌هيزتر له جاران له‌سه‌رجه‌م بواره‌يل وه‌ره‌و نوا چووگ و يه‌يش له‌لايه‌ن دووس و دوژمنه‌و دگان وه‌پيا نرياگه.
گشت ساڵيگ وه هاتنه‌وه‌ى 22 رێبه‌ندان، رووژيگ كه ئيمام خومه‌ينى(ره)وه يوم الله ناوى برد، يادوه‌ريه‌يل ملله‌ت ئيران تازه‌وه بوون، رووژيگ كه ئى ملله‌ت قاره‌مانه وه پشتبه‌سانن وه هيز و تواناى خوه‌يان چاره‌سه‌نويس ئيران سه‌رله‌نوو ديارى كردن و وه به‌خشين گيان و ماڵ خوه‌يان هێڵ سه‌روه‌خوه‌يى، ئازادى و كۆمار ئسلامى له‌ى خاك پڕ له شانازيه ديارى كردن.
شۆرش ئسلامى ئيران ئه‌و شۆرشه بوى كه داواى رزگاربوين له‌ژير زوڵم و چه‌وسانن ره‌وت سته‌مكارى جه‌هانى كرديان و ئمڕوو وه شانازيه‌و ئاموژگاريه‌يل شۆرش ئسلامى بويه‌سه ده‌رسيگ ئه‌را ئه‌و ملله‌ته‌يله ك هيوا وه ئازادى و سه‌ربه‌رزى ديرن.
يه‌كشه‌ممه 22 رێبه‌ندان 1369 كووچى قه‌مه‌رى وه‌ك رووژ نيشتمانى، لاپه‌ڕه‌يگ تر له تاريخ ئاڵتوينى ئيران ئسلامى تۆمار كريه‌يگ، له‌ى رووژه به‌يعه‌ت خوه‌مان وه‌ل رابه‌ر گه‌وراى شۆڕش ئسلامى تازه‌وه كه‌يمن، ئه‌ويش ئه‌را مه‌ردم جه‌هان ئسپات كه‌يمن كه هيز ملله‌ت وه‌رده‌وامه له پشتگيرى شۆرش ئسلامى و پويچه‌ڵكردنه‌وه‌ى پيلان دوژمنه‌يل وه‌تايبه‌ت ئه‌مريكا و رژيم زايۆنيستى/ جام كوردى