08/03/2018
ئيشراق 651 جار بینراوە
كه‌مه‌وكردن مووچه‌ى سياسيه‌يل ئه‌را نيمه حزب و كانديده‌يل كه‌مه‌و كه‌يگ
سيستم ديموكراسى له جه‌هان ئه‌وه‌سه ده‌سڵات ها ده‌س ملله‌ت. وه‌چه‌واشه‌ى رژيم په‌رله‌مانى عراقى كه ده‌سڵات ها ده‌س سياسيه‌يل و دزى و تاڵانى ها ده‌س سياسيه‌يل و تيرۆر ها ده‌س سياسيه‌يل و پيشكه‌ش نه‌كردن خزمه‌تگوزاريه‌يليش له‌لايه‌ن سياسيه‌يل و ويرانكارى وڵات له‌لايه‌ن سياسيه‌يل و ويرانكردن حكومه‌ت هه‌ر له‌لايه‌ن سياسيه‌يله‌وه ئه‌نجام گريگ.
هووكاريش ئه‌وه‌سه ئه‌مريكا وه‌ختيگ كه حكومه‌ت دامه‌زران له‌ى حزبه‌يله ڕى وه‌پيان دا مووچه‌ى فره به‌رز ئه‌رايان بووڕنه‌و و له‌وانه‌يش خانه‌نشينى ئه‌رايان و ده‌س كرده زيايكردن نه‌سريه و رزه‌يل سه‌ياره ئه‌رايان و ئه‌را پاسه‌وان و له ماڵه‌يليانيش.
بيگومان نيمه‌ى بودجه ئه‌را سياسيه‌يل خاوه‌ن موچه‌ى به‌رز ته‌رخان كريا، يه‌يش بيجگه ئه‌وه‌گ پويل پرووژه‌يل درووكانييش دزن و هويچ خزمه‌تگوزارييگ پيشكه‌ش نيه‌كه‌نه هاووڵاتيه‌يل و جايه‌ڵ جوانه‌يلمانيش هه‌ر له په‌يمانگاو كۆليژ ده‌رچن وڵيان كه‌نه جاده‌و بيكارن له‌بان كنار رى و جاده‌يل شار.
ئنجا چوين ئالشتكارى له عراق روێ بيه‌يگ و حزبه‌يل كه‌مه‌و بكريه‌ن. يه‌يش هه‌وه‌جه وه خوه‌ينيشانداين گه‌ورا ديريگ و له‌تى داواى داگرتن مووچه‌ى سياسيه‌يل بكريه‌يگ ئه‌را نيمه، وه‌ل كه‌مه‌وكرن سه‌ياره‌يل و پاسه‌وانه‌يليان ئه‌را نيمه كه‌متر و موحاسبه‌كردن حكومه‌ته‌يل وه‌رين و ئيسه‌يش له‌بان پرووژه‌يل درووكانى.
وه‌ى جووره ئه‌و سياسيه كه چوار ماڵ ديريگ سييان له‌لى زه‌فت بكريه‌يگ و يه‌ك ماڵ ئه‌راى بيليده‌و. يا موحاسبه بكريه‌يد تا بزانريه‌يگ له كاملا ئى هه‌مگه ماڵه‌يله هاوردگه، دى وه‌و جووريشه حزبه‌يليش كه‌مه‌و بوون و ئه‌و حزبه‌يله تيه‌نه مه‌يدان كه خزمه‌ت وه عراقيه‌يل بره‌سنن وه‌بى فه‌رهود و دزى و له هه‌مان وه‌خت بار عراقيه‌يليش وه‌ره‌و خاسى چووگ.
عه‌لى محه‌مه‌د ئه‌لجێزانى