01/03/2018
ئيشراق 633 جار بینراوە
وه‌ختيگ هاووڵاتى باج غه‌ڵه‌ت سياسيه‌يل ده‌يگ
بيگومان بار خراو ئابوورى ك هاته‌سه تويشمان له ئاكام هووكاره‌يل فره‌يگ ئاشكرا و دياريكرياگه له‌گشت لايگه‌و، له‌وانه‌يش داوه‌زين نرخه‌يل نه‌فت جه‌هانى و خراوى ئداره‌ى حكومى ئه‌را گشت دوسيه‌يل و له‌وانه‌يش دوسيه‌ى ئابوورى و بڵاوبوينه‌وه‌ى گه‌ناته‌كارى له گشت دام و ده‌زگايه‌يل ده‌وڵه‌ت ده‌وڵه‌ت.
من له‌يرا خوازيارم باس ئه‌و هووكاره‌يله بكه‌م ك ره‌سانه‌مانه ئى حاڵه‌ته، وه‌لێ خوازم بويشم كه هاووڵاتى عراق يه‌كيگ له‌و هووكاره‌يله نه‌ويه، ئنجا له‌ڕوى گفت و دادگه‌ريه‌و ئه‌وه‌سه ك تاوان غه‌ڵه‌ته‌يله كه‌سه‌يل تر هه‌ڵنه‌گريد و باج ئه‌و جورمه نه‌يه‌ێگ، وه‌لێ ژان ها له‌ورا ك له‌ڕاسى ئى چشته روێ ده‌يگ و سياسيه‌يل هه‌ڵه كه‌ن و دزى كه‌ن و هاووڵاتييش رووژانه ناڕه‌حه‌ت بوون و باج ئه‌و غه‌ڵه‌ته‌يله ده‌ن، دى له كه‌مى گشت خزمه‌تگوزاريه‌يل سه‌ره‌كى بگر تا ره‌سيگه تواناى سه‌ندن و نه‌وين ده‌رفه‌ت كار و كه‌مه‌وكردن مووچه‌يل و به‌رزه‌وبوين نرخ كرايه و باجه‌يل تازه‌ى به‌رزه‌وكرياگ له گشت بواره‌يل ژيان له‌يوا له هاووڵاتى كه‌يگ روى له هه‌ركوورا بكه‌يگ ئه‌و باجه بيه‌يگ جوور ئه‌وه‌گ بويشيد خه‌زينه‌ى قارون داشتووگ، ئايا ئه‌يه دادگه‌رى وه‌پى ئويشن؟
ئه‌وه‌گ سه‌رم له‌لى سوڕمينێد ئه‌ويش هه‌ڵويست حكومه‌ته ك وه‌گشت ئازايه‌تى و مه‌كريگه‌و دقه‌ت له‌بان يه‌ك لايه‌ن كرد، ك ئه‌ويش چوينێتى كه‌مكردن ئه‌و كه‌ميه بوى له بودجه‌و چوينێتى ده‌سكه‌فتن داهات تازه‌يگ ئه‌را بودجه‌گه وه‌ل چوينێتى له‌وه‌رگرتن ڕى وشوون و رينمايه‌يليگ ك شايه‌ت جيوه‌جى ئى ئامانجيه وه‌پى بكاو ئه‌را ته‌نيا جاريگيش هوير له‌وه نه‌كرد گشت ئى رى وشوونه‌يله ك وزاره‌ته‌يل و دام وده‌زگايه‌يل حكومييش جيوه‌جيى كرديان ئه‌و داراييه له هاووڵاتى ئاسايى كه‌فێگه ده‌سى له‌وه‌ختيگ كه بايه‌سه حكومه‌ت وه شيوه‌يگ سه‌ره‌كى هوير له هاووڵاتى بكردياد و هه‌زاران جار هوير له ڕيه‌يل راسيگ بكردياد ئه‌را كه‌مه‌وكردن مه‌ينه‌تى له‌بان هاووڵاتى و له‌وانه‌يش هوير له كه‌مه‌وكردن نرخ به‌رز هه‌وه‌جه‌يل بنه‌ڕه‌تى ئه‌را ژيان هاووڵاتى و له‌وانه‌يش مادده‌ى خوارده‌مه‌نى و ته‌ندروسى و داوه‌زانن نرخ كرايه‌ى هاتوچوو و كرا ماڵ و چشته‌يل تر سوزه‌مه‌نى جوور ئه‌وه‌گ له گشت وڵاته‌يل تر دونيا جيوه‌جى كريه‌ێد، ئه‌ويش وه بوونه‌ى داوه‌زين نرخ نه‌فت، وه‌لێ هاووڵاتى عراقى هيمان گاز و به‌نزين و نه‌فت وه نرخ به‌رزيگ سينن.
له‌يرا ئويشمه حكومه‌ت و چين سياسيه‌يل وه‌گشتى هاووڵاتى مه‌كه‌نه كه‌لپه‌لدانيگ ئه‌را ئه‌وه‌گ غه‌ڵه‌ته‌يلدان وه‌پيا هه‌ڵواسين، بايه‌سه له باندان رى وشوونه‌يل گورج بگرينه وه‌ر و چاره‌سه‌ره‌يل سه‌ركه‌فتگيگ په‌يا بكه‌ين له‌وه‌ر كه‌مه‌وكردن فشار له‌بان هاووڵاتيه‌يل له گه‌شت مه‌ينه‌تيه‌يل رووژانه‌يان له‌وه‌ر ده‌سكه‌فتن تيكه‌ى نان ئه‌را بژيوى ژيان و بايه‌سه ئى راسيه بزانين ك شايه‌ت هوير له‌لى نه‌كردينه، ك ئه‌ويش ئه‌وه‌سه قه‌يران مه‌ترسيداريگ روى له‌ى وڵاته كردگه‌و نه‌بايه‌د وه ئاسانى قورتار له‌لى بويمن مه‌گه‌ر وه زه‌مانه‌ت هاوكارى هاووڵاتى وه‌ل حكومه‌ت و ئه‌گه‌ريش ئيوه تواين ئه‌و هاوكاريه زه‌مانه‌ت بوود بايه‌سه نيه‌تدان وه‌ليانا پاك بووگ و كار ئه‌را بنيتنانه‌وه‌ى پيه‌ڵه‌يل متمانه بكه‌ين ك ويران بويه‌و وه ته‌مامى گوم بويه له ئاكام ئه‌و زوڵمه‌يل فره ك رووژانه تيه‌يگه تويش هاووڵاتى له‌بان ده‌س ئيوه‌و له ئاكام ئه‌و گه‌ناته‌كاريه كه بووه‌گه‌ى دونيا گرته‌سه‌وه‌و له ئاكام ئه‌و خوه‌شگوزه‌ريه ك ئيوه له‌تى ژيه‌ن وه‌بان دارايى ملله‌ت.
رائد الهاشمي