04/02/2018
ئيشراق 524 جار بینراوە
ئامانج روسيا له وڕيوچگن دانيشتنيل سووچى
بيگومان كرملن له ماوى ساڵيل گوزيشت وردوام هوڵ ئوه داگه كه نك تنيا له ناوچى رووژهڵات ناوڕاس شوون پا و كاريگرى خوى دربخيگ، بڵكوو پلان ئوه ديريگ جوير گوراهيزيگ ناودوڵتى رۆڵ زياتر له هوكيشيل جهان داشتووگ.
دياره كه روسيا له سياست ديشت خوى زياتر هس وه هيز نرم كردگه و لى روييشو هوڵ ديگ تا رۆڵيگ كاريگرى له روت ئاشتى ناوچى رووژهڵات ناوڕاس داشتووگ، وه ئى ئامانجيشه هوڵ داگه رۆڵ ناوجيكرى له پيوندييل ئيراان و سعوديه داشتووگ يا گام ورو ئاشتى ناونى ئسرائيل و فلستينييل بنيگ
وه ئى ديدة هوڵيلى لور خاتر چارسربوين قيران سوريا نك كيش نيريگ، بڵكوو وه خواستيش دانرييگ، لور ئوگ روسيا وه يكيگ له لاينيل كاريگر قيران سوريا دانرييگ و وه ئاشكرايش دخاڵت سربازى داشتگه و ئيسيش وردوام له روى سربازيو له سوريا دوينرييگ.
ليرا وه باوڕم دو ملاحزه دوينرييگ ئرا گامناين كوشك كرملن:
يكم ئوگ كه مۆسكۆ توايگى زياترين برژوندى له روى دانيشتنيل چارسربوين قيران سوريا كه لو وڵاته وڕيو چووگ باريگه دس.
للايگ ترو، دياره روسيا هوڵ ئوه ديگ كه وجوود سربازى خوى له سوريا وه تمامى وه ئاراستى مسۆگربوين ئاشتى بوويگو پلاماريلى وه تنيا دژ وه تيرۆريستيل بووگ و وه هوڵداين ئرا دانيشتن ناونى حكومت ديمشق و نياريل پاداگرى لوه بكيگ كه روسيا ريز له برژوندى گشت لاينيل كاريگر سوريا گريگ.
خاڵيگ كه ليرا بايسه ئاماژه وپى بدرييگ ئوسه كه لى بارودخ ئيسه نيتوينيم سبارت وه هويچ دانيشتنيگ درئنجاميگ تواو بخيمنه روى، ولێ موهم ئوسه كه دانيشتنيل بوونه ريخوشكر چارسربوين قيران چندين ساڵيل سوريا.
ئيسيش نورى ئو پرسيارسه كه ئايا روسيا و ئمريكا هردوگيان هوڵ مسۆگربوين ئاسايش و سقامگيرى سوريا دن؟ ئو باوته كه ليرا زياتر له داناين دستووريكى تازه ئرا سوريا ئهميت ديريگ، جيوجيكردن ئى دستوورسه و خاڵ موهم ئوسه كه واشنتۆن و مۆسكۆ لى مسله ستراتيجيتيگ هاوبش داشتوون.
احمد وخشيته