06/03/2018
ئيشراق 551 جار بینراوە
ديموكراسى له خوه‌رهه‌ڵات ناوڕاس!
دياره ماركسیزم له خوه‌رهه‌ڵات جوور مه‌زه‌ویگ سیاسى شكه‌ست هاورد، ئه‌وانه‌ك ماركسیزم كردنه به‌رنامه‌یگ ئه‌را كار سیاسى چ له‌وه‌ڕیه‌وبردن ده‌وڵه‌ت چ له‌پرووژه‌ى رزگارى چینایه‌تى و نه‌ته‌وه‌یى، له ده‌رسه‌یل سه‌ره‌تایى ئه‌و فكره نه‌ڕه‌سوینه‌وه‌و له شوونه‌یلیگیش وه زوور و حوكم گورز و ئاسن په‌یڕه‌وى كردیان و له‌شوونه‌یلیگیش وه‌ل هێزه‌یل تر سازش كردیان له‌بان بنه‌مایه‌یل ماركسیزم، یه‌یش له‌وه‌ختیگ خود ماركس هه‌میشه له‌وه‌ر خاتر وه‌دیهاوردن ئه‌و جه‌هانه كه خوازیارى بوى قسه له‌بان ژێرخان و هه‌ل و مه‌رج و جێگیركردن مێژوو چینه‌یل و یاسایه‌یل بنه‌ڕه‌تى ماركسیزم جوور زانست كردیاد.
باس له‌وه‌يش كه‌ن كه گوايا دیموكراسییش هه‌ر له ئه‌وروپا سه‌وز كرد و ره‌سیه ئه‌و مه‌رزه‌یله ك بڕێگ له فكرمه‌نه‌یل وه‌پیان له‌یواسه ئى فۆرمه دویا فۆرم گه‌شه‌ى هونه‌ره‌یل وه‌یه‌كه‌و ژیان و ئداره‌كردنه، وه‌لى له خوه‌رهه‌ڵات و ده‌وڵه‌ته‌یلى ئابڕویى چییه‌و دى وه‌گشت چشتیگ ئویشن دیمۆكراسى!.
دیموكراسى له تاریف خوه‌رهه‌ڵات ته‌نیا له سندووق و ڕز ده‌نگداین و لیست ساخته‌كارى و چشته‌یلیگ خوه‌ى دیه‌سه‌و، دى ئه‌وه نيه‌زانن ك دیمۆكراسى سیستمیگ نرخدار و ره‌فتارى بێ كێشه‌و گرفته، كه نه‌ك تائیسه ئیمه هووكاره‌ى پیاده‌كردنى نه‌ویمنه، به‌ڵكوو له‌لى نه‌فامستیمه.
وه‌ل ئه‌وه‌يشا ئى چه‌مكه له ئه‌ده‌بیات و باوه‌ته‌یل لاى خوه‌مان وه ئاسان چووگه ناو گشت نویساننیگ و هه‌ر لایه‌نیگیش وه ئاره‌زوو خوه‌ى شیه‌وكردن ئه‌راى كه‌يگ. دێوى ئویشيگ: دیمۆكراسى رێكخریاگیگ تۆكمه‌ى ره‌فتارى و هه‌ڵسووكه‌فته، هه‌ر له‌وه‌ر ئه‌وه‌یش هویچ چشتیگ چه‌نه دیمۆكراسى په‌یوه‌س نییه وه واقعه‌و.
دى تويه‌نيم بويشيك كه شكه‌ست دیمۆكراسى له خوه‌رهه‌ڵات وه‌گشتى و له عراق وه‌تایبه‌ت ئه‌و ئحساسه له‌لامان دروس كه‌يگ كه سایكۆلۆجیه‌ت تاكه‌یلمان تا ئیسه ئه‌وقه‌ره وه‌ل ته‌كڕه‌وه‌یل جفته ئه‌وه‌نه خوه‌شى له دیمۆكراسى نیايگ و شایه‌دیش به‌شێگ له‌وانه‌گ له‌ڕوى فكریه‌و له دیمۆكراسى فامستنه هویر له‌وه بكه‌ن دڵنگ دیمۆكراسى وه وه‌ریان نه‌كه‌يگ و نه‌زانن وه‌ل ئاست گه‌شه‌كردن ئه‌قڵى و فكرى مه‌ردم بگونجننه‌ى و دویاخریش ئه‌وه‌ك دیریمنه‌ى له‌ده‌سمان ده‌رچوود.
هه‌ر له‌وه‌ر ئه‌وه‌يش با گشتمان وه‌یه‌كه‌و دوعا ئه‌را دیمۆكراسى بكه‌یم!! تا وه یه‌كجارى جوور كۆمۆنیزم وه‌پى نايگ، ئه‌گه‌ر رووژيگ له رووژان روێ له‌لامان كرد بيلا وه خاسى ئمایه‌تى بكه‌یم تا دى له‌ماڵ خوه‌ى گوم نه‌وگو هه‌میشه له‌هه‌ر شوونیگ هه‌وه‌جه وه‌پێ داشتیم ئاماده بووگ.
مه‌حمود ته‌ها