21/03/2018
ئيشراق 640 جار بینراوە
نه‌وروز و نیشانه‌ى ژیان له ئاینده‌یگ جیاواز
ئه‌گه‌ر نه‌وروز یاد و جه‌ژنیگ هاوبه‌ش چه‌ندین ملله‌ت جۆراوجۆر بووگ، ئه‌وا ئه‌را كورد له سه‌ده‌ی بیسته‌م و له چوارچێوه‌ی دووباره مانا وپێدانه‌وه و بارگاویكردن وه چه‌ندین ئاماژه‌ی تازه‌ى نه‌ته‌وه‌یی، ئه‌هميه‌تيگ جیاوازتر ديريگ.
نه‌ورۆز له باسكردنه كوردییه نه‌ته‌وه‌یی و نیشتیمانیه‌گه‌ى، نيشانه‌ى خه‌بات و نه‌كه‌فتن و شكانن زوڵم و زوور و سه‌ركه‌فتن ئیراده‌ی خێر و خاسه‌س له‌بان خراوه‌كاری و تاوان.
ئه‌گه‌ر جه‌ژن ڕه‌مه‌زان نيشانه بووگ ئه‌را بويين وه خاوه‌ن خود و ره‌سين وه وه‌خته‌يل كۆنترۆڵكردن حه‌ز و ئاره‌زوو غه‌يزه‌يل و فه‌رمانڕه‌ه‌وايى ئه‌قڵ ئيمان، و جه‌ژن قوربان ڕه‌مز سه‌ندنه‌وه‌ی ڕه‌وایه‌تی بووگ له‌قوربانییكردن ئاده‌ميزاده‌يل وه‌ناو ئاین و كۆمه‌ڵگه و ده‌سه‌ڵاته‌وه، وه‌و مانا وه‌ده‌سهاوردنه‌وه‌ى ماناى ئنسانبوين و يه‌كساننه‌كردنى وه ئاژه‌ڵ و هاوردنه‌وه‌ى ئه‌را بارن عه‌رش ئنسانيه‌ت، ئه‌وه نه‌وروز له ڕويه سیاسی و ئه‌خلاقیه‌گه‌وه، ئه‌و نيشانه و ماناو ڕه‌مزانه له‌خوه‌ى گرده‌و كه‌يگ و بووگه نيشانه‌ى شكانن خود ئه‌ه‌و كلتوور و ده‌سڵاته كه خوين ئاده‌ميزاد خوه‌يگ و كه‌يگه‌ى كۆيله و رى ئه‌وه وه‌پى نيه‌يگ چاره‌نويس و جووره‌يل ژيان خوه‌ى ديارى بكه‌يگ.
نه‌وروز له‌ى رويه‌و شكانن گشت ئه‌و هه‌مگه چوارچيوه زهنى و هويره‌وكردن و شيه‌وكردنه‌يله‌سه كه ڕێ له‌وه گرن ئاده‌ميزاد چه‌وى له ئاينده‌يگ دويرتر له واقع ئيسه بووگ، چاره‌نويس هيزه‌يل له ئاينده بدوينيگ.
وه مانايگ تر نه‌وروز بانگه‌وازه ئه‌را هويره‌وكردنن و ژيان له ئاينده، نه‌ك جوور خه‌ياڵپڵاو و بيبه‌شبوين له واقع، به‌ڵكوو وه‌ك ميكانيزميگ فكرى و ده‌روينى و ئه‌خلاقى ئه‌را خوه‌د وه‌ده‌سه‌و نه‌يان وه‌ده‌س واقعه‌و، كه زوحاكه‌يل سه‌رده‌م جياجيايه‌يل دروسى كه‌ن و خاوه‌ندارى له‌لى كه‌ن، چوينكه نه‌وروز نيشانه‌ى تاريخيگ وه‌سه‌رچگ نيه، به‌ڵكوو ئاماژه‌س وه سونه‌ت و ده‌ستووريگ گه‌ردونى و خودايى كه له قوناغه‌يل جياجيا دوباره‌وه بووگ.
ئه‌بوبه‌كر عه‌لی