خوەنینەوەیگ لە هەڵویست "ئسرائیل" لە ریڕەو ریککەفتن نەوەوى

مەیدان ئسرائیل دوشمنکار جووریگ لە جموجویل دبلۆماسى و ئعلامى جوور حاڵەت ئاگادارکردنەوە وەخوەیەو دى، دویاى ئەو ئاماژەیلە ک پیشبینى ئمزاکردن ریککەفتن نەوەوى کردیاد وەل ئیران، و کاردانەوەیلى لەلاى دەزگایەیل فەرمى دوشمن و ئعلامیەیلى جووریگ لە ترس لەلى کەفتەوە لەو هەڵویستە لە ریککەفتن سەرلیشیویاى ئیسە.

سەرۆک ئیسەى حکومەت دوشمن یائیر لابید کورتەیگ ئەرا رووژنامەنویسەیل بیگانە پیشکەش کرد و لەتى وت: ئەوەگ ئیسە خریاسە لەبان مێز، ریککەفتن نەوەوى خراویگە ک ساڵانە 100 ملیار دۆلار بەخشێدە ئیران. ئى داراییە خوەندنگا یا نەخوەشخانەیل وەپى دروس نیەکریەێد، بەڵکوو 100 ملیار دۆلار ساڵانە وەکار تیەریەێد ئەرا شیوانن سەقامگیرى خوەرهەڵات ناوین و بڵاوکردنەوەى تیرۆر لە جەهان.  

لەبید وت: ئیمە دژ هویچ ریککەفتنیگ نییم، وەلێ ریککەفتن ئیسە وەگوورەى ئەو پەیمانەیلە نییە ک سەرۆک بایدن دایناگە ئەرا نواگیرى لە ئیران لەوەگ نەودە وڵاتیگ نەوەوى. ئاشکراى کردیم ئەرا گشتلایگ ک ئسرائیل لە حاڵەتیگ ئى ریککەفتنە ئمزا بکریەێد، پابەند نیەود وەپیەوە و جموجویل کەیم لەوەرخاتر نواگیرى لە ئیران ک نەودە دەوڵەتیگ خاوەن نەوەوى.

وەل ئەوەیشا وەزیر ئەمن دوشمن بینى غانتس و جیگر سەرۆک حکومەت نەفتالى بینیت راى خوەیان دەرخستن لەبارەى هەڵویستەیل ناڕەزایەتى وەرانوەر ریککەفتن نەوەوى ناتەواو لەناونى ئیران و هیزەیل ناودەوڵەتى.

حکومەن وەو لێدوانەیل ئعلامییە نەوسیا، غانتس رووژ پەنجشەممەى ئایندە روێ لە ولایەتەیل یەکگرتگ کەێد، ئەویش دویاى سەردانەگەى سەرۆک ئەنجومەن ئاسایش نەتەوەیى ئیال حولاتا، و مەسەلەگە ئەوەسە ک دوشمن هەوڵ وەرگرتن زانیارى دەێد لە نزیکەوە لەبارەى ئمزاکردن ریککەفتن نەوەوى.

حکومەت لەبید هەوڵ فشارخستن دەید وەخاتر زانستن هویردەکاریەیل و دەسوەرداین لە دویا چرکەیلیگ ئەرا زەمانەتکردن ئەوەگ ئى ریککەفتنە خراوتر نەود لە ریککەفتن وەرین ساڵ 2015، ک لەوەخت سەرۆک وەرین ئەمریکا باراک ئۆباما ئمزا کریا، و لەوەخت سەرۆک وەرین دۆناڵد ترامپ لەساڵ 2018 هەڵوەشریاوە.

سەرکردەیل دوشمن خاس لەوە رەسینەسەوە ک رینمایەیل سەرۆک ئەمریکى جۆ بایدن، لەوەختیگەو سەرۆکایەتى ئەمریکى گرتەسە دەس، رێ وەرەو گلەوخواردن ئەرا ریککەفتن نەوەوى گرتەسە وەر وەل ئیران، و ئدارى ئەمریکى خوەیکیشانەوە لە ریککەفتن ساڵ 2015 وە هەڵەى گەورایگ زانید.

باوەڕیشى ئەوەسە نەڕەسین وە ریککەفتن وەل ئیران بوودە هەڵەیگ گەوراتر ک دەرئەنجامى خروتر بوود لە ئایندە، مەسەلە لەیرا ئەوەسە ک حکومەت دوشمن سەربار لێدوانەیل رەتەوکریاگ ئعلامى ئەرا ئمزاکردن ریککەفتن، هەوڵ لەناوبردنى نیەێد، چوینکە نیەتویەنێد وە ئاسانى ئەو کارە ئەنجام بیەێد، بەڵکوو کار لەبان فشار کەێد وەرەو جیوەجیکردن مەرجەیلیگ خاستر لەلى.

لەلایگ ترەوە، هەڵویست ئعلامى سەرکردەیل دوشمن دژ وە ریککەفتن ئامانج لەلى دەنگەیل زیاتریگ بارنە دەس وەرجە هەڵوژاردنەیل زایۆنى لە تشرین دویەم/نۆڤەمبەر ئایندە، وەل ئەوەیشا هاوپەیمانى لەبید – بینیت – غانتس خاس زانێد ک ئدارەى ئەمریکى مەیل وە هاتنەوەى بنیامین نەتانیاهۆ سەرۆک ئۆپۆزسیۆن و سەرۆک وەرین حکومەت دوشمن نەیرێد ئەرا حوکم، و شایەد وەتەنیا کار بکەێد ئەرا دەرفەت سەرکەفتن هاوپەیمانیەگەى لە هەڵوژاردنەیل ئایندە، ئەویش لەوەر ئەوەگ دەورەیل گەورایگ داشت لە هانداین ترامپ وەرەو خوەیکیشانەوە لە ریککەفتن نەوەوى، و سیاسەتەیلیگ ئاشکراتر گرێدە وەر دژ وە رینمایەیل ئەمریکى وەرانوەر نەوەوى ئیرانى، لەوانەیش لەوەخت سەرۆک وەیرن ئەمریکى باراک ئۆباما بوى.

دیارە حکومەت دوشمن فشار دروس کەێد لەوەر ئەوەگ وادەى کووتاییهاتن ریڕەو ریککەفتن نەوەوى دریژتر بوود لە ریککەفتن وەرین، وەل ئەوەیشا فشار خەێد ئەرا مەندنەوەى سزایەیل لەبان کۆمپانیایەیل ئیرانى، و نەوەسانن سێ دوسیە ک ئاژانس وزەى ناودەوڵەتى وازى کرد دژ وە ئیران لەبارەى پاشیلکاریەیل وەرین ریککەفتن نەوەوى، وەلێ لە هەمان وەخت زانیدیش ئى کارە ئاست کاریگەریەیلى چەنیگە لەشاى رویکردن ئدارەى بایدن ئەرا ئمزاکردن ریککەفتنەگە.