حقد تايفه‌چييه‌تى
ئه‌وه كه‌فته ده‌ر كه له بدايه‌ت په‌یابوین بار و وه‌زع ئازادى و دیموكراتى ته‌پڵ شادى و به‌خته‌وه‌رى كوتريا له ئاكام نه‌مه‌ندن زوڵم و زوور و زه‌فتكردن رووح ئنسانیه‌ت له راحه‌ت و كوشتن و ده‌سگیردن روڵه‌یل ملله‌ت عراق و جه‌نگ و ويرانه و رويداگه‌یل تر سه‌خت، وه‌لى دویاى دامه‌زرانن حكوومه‌ت وه‌ختى له به‌غداو له دویاى ئه‌نجامداین ئنتخابات 2005 دیاره چاره‌نويس نه‌تواس خه‌و مه‌زڵومه‌یل وه‌ته‌مامى جیوه‌جى بوود و كاره‌گه له‌يوا وه‌پى هات بار سیاسى روى له خراوى كرد و عراقيش وه‌ره‌و جه‌نگ داخلى و تایفه‌چييه‌تى كیشاو له شوونه‌یل فرهیگ ناوڕاس و جنوب وڵاته‌گه ئاگر جه‌نگ گڕ گرت و هیزه‌یل حكومى تويش جه‌نگ چه‌كداره‌یل هاتن.
له دویاى ئه‌وه‌یش حوكم و ده‌سڵات سیاسى وه‌گشت ته‌قلايگه‌و نه‌تویه‌نست وه ته‌مامى زاڵ بووده بان بار سیاسى و تواناى مه‌سه‌له‌ى بنبڕكردن بار تایفى و گرفته‌یل داخلى نه‌یاشت، جيا له‌وه‌يش حوكم تونڕه‌وى و ته‌كڕه‌وییش په‌یا بوى له سستم ده‌سڵات.
ئه‌وه بوى له‌و كیشمه‌كیش و جه‌نگ كه‌مه كه‌مه وه‌زع عراق شيوياو كار ره‌سیه ئه‌وه‌گ مه‌ردم بیتاوان له‌بان جنسيه كوشیان و بيجگ له‌وه‌يش كوشتن ناونى سنى و شیعه هاته وجوود و ئه‌قه‌ليه‌يك تریش له‌لى بیبه‌ش نه‌وین كه هه‌تا تائیسه‌یش ته‌ئسيرى مه‌ندگه‌و گرووپه‌یل چه‌كدار هیمانى ده‌س له كوشتن و رواكانن مه‌ردم بیده‌سڵات هه‌ڵنه‌گرتنه، يه‌يش له وه‌ختيگ كه هیزه‌یل ئه‌مریكایش له عراق وجوود داشت.
ئى كاره له‌يوا وه‌پى هات خوین فرهیگ رشیاو هه‌تا ئیسه‌یش جه‌نگ سیاسى و جه‌نگ مه‌رامه‌یل ده‌سكه‌فت و به‌رژه‌وه‌ندى تایبه‌ت ملله‌ت بیچاره‌یش وه‌ره‌و مه‌ترسى ناسه‌قامگیرى برد جه‌نگ و كوشتار ریكخریاگ ترۆریستى داعش و گرووپه‌یل تونڕه‌ویش رووژ وه رووژ وه ئاشكرا نوا له ئاسایش و سه‌رفرازى گرت و حزب و لایه‌نه‌یل سیاسییش هه‌ر هانه هه‌وڵ نه‌قدكردن به‌رژه‌وه‌ندى و شیوانن بار عراق و بوینه سه‌به‌ب كووچكردن شماره‌ى فرهیگ له روڵه‌ى ئى وڵاته‌و حقد چینایه‌تى و تایفه‌چييه‌تى جيگير كريا.
ریاز عه‌بدولكه‌ریم