يادگارى تاريخ كورده‌يل فه‌يلى
نويسه‌ر كورد فه‌يلى "بالوول كوردى" له مه‌قاله‌يگ باس قه‌يريگ یادگارى كرديه‌و وه‌تيه: هه‌ناى مه‌شغوڵ گرده‌و كردن وه‌سيقه‌يل قه‌يمه بویم تایوه‌ت وه كورده‌یل فه‌یلى و هه‌وه‌جه‌ى كرديان ئه‌را مه‌سه‌له‌ى دادگاییكردن سه‌ران رژیم سه‌دام گوڕوه‌گووڕ و تایوه‌ت بوین وه تاوانه‌یلیان زد فه‌یلیه‌یل، چه‌ن وه‌سيقه‌يگ تاريخى كه‌فته وه‌ر چه‌وم، جویر وه‌سيقه‌ى خزمه‌ت عه‌سكه‌رى له بدايه‌ت دروسبوين له‌شكر عراقى و ئه‌و چه‌ن قه‌واڵه‌يگ ك تاريخ بڕيگيان گله‌و خوه‌يد ئه‌را ساڵ 1860 له ناوچه‌ى عه‌گدولئه‌كراد و له‌وانه‌يش ماڵ خوداى بيامه‌رزى"مه‌لا نه‌زه‌ر"و ماڵ خوداى بيامه‌رزى(ئه‌حمه‌د مجه‌به‌رچى)و خوداى بيامه‌رزى(ئه‌حمه‌د فه‌یلى)مه‌زرنه‌ر حسه‌ینیه‌ى ئه‌حمه‌دى له باب ئه‌لشێخ له‌ساڵ 1921.
نویسه‌ر له مه‌قاله‌گه‌ێ نويساس: یه‌كه‌مین په‌یمانه‌سازى ئاو"مقیاس الماء"له به‌غدا شماره‌ى (1) له‌بانى نویسیايه، خاوه‌نه‌گه‌ى كورد فه‌یلیه له عه‌گدلئه‌كراد و ئه‌و ماڵه ك ئه‌و په‌یمانه‌ى ئاوه له‌تى دانریا وه‌ناو خودا بيامه‌رزى(محه‌مه‌د مامه زه‌مان) له ئێڵ دوستان فه‌یلى بويه.
بيج له‌وه‌یش یه‌كه‌مین وه‌سيقه‌ى خزمه‌ت عه‌سكه‌رى له بدايه‌ت دامه‌زرانن له‌شكر عراقى خاوه‌نه‌گه‌ى كوردیگ فه‌یلى بویه وه‌ناو حاجى( ئه‌حمه‌د تاماز هه‌واس عه‌وزه‌لى)و زايندى ساڵ 1907 و له وه‌خت ده‌سڵات سه‌دام له ساڵ 1980 وه‌خوه‌ى و خیزانيه‌و وه هجه‌ى ته‌به‌عيه ده‌ركريان ئه‌را ئیران.
له وه‌سيقه‌يلتر كورده فه‌یليه‌يل، ئه‌ويش هه‌ناى وازكردن سكه‌ێ ئاسنين بوى وه‌بان پیه‌ڵ ئه‌لسه‌رافیه‌وه دريژه‌و بوود و له‌ساڵ 1936يش گشت سایه‌قه‌یل قتار نه‌ویرستنه ئه‌ڕا یه‌كمجار وه‌بان ئه‌و پیه‌ڵ قتاره‌و بچنه ئه‌وديم و ته‌نیا كه‌سیگ ك ڕازى بویه وه‌بانيا گووزه‌ر بكه‌ێ كوردیگ فه‌یلى بویه وه‌ناو خوداى بيامه‌رزى( مه‌جید فه‌یلى)خه‌ڵك ناوچه‌ى ئه‌لسه‌دریه له وه‌رانوه‌ر عه‌گدولئه‌كراد و یه‌كه‌مین گه‌واهى سایه‌قييش(أجازه السياقة) له به‌غدا خاوه‌نه‌گه‌ى كورد فه‌یلى بویه.
