20/07/2023
تەمارا برو
182 جار بینراوە

دویاى ئەوەگ ئۆکرانیا تەقەمەنى وەرگرید

قەیران کلکردن چەک یۆرانیۆم کەمەو بوى ئەرا کیێڤ ک وە زەحمەت کووتایى وەپى هات، و فلادیمیر پۆتن سەرۆک روسیا قەسەم خوارد لە ئەگەر وەکارهاوردن چەک جواو بیەیدەوە، تا ئەو وەختەگ جۆ بایدن سەرۆک ئەمریکا خواست وڵاتەگەى ئەرا دابینکردن تەقەمەنى ئەرا ئۆکرانیا ئاشکراکرد. کەمتر لە هەفتەیگ دویاتر کیێڤ ئاشکرایکرد ک وەڕاسى ئەو تەقەمەنى جەمەوکریاگە وەرگرتگە.

کلکردن ئى جوورە تەقەمەنییە ئەرا ئۆکرانیا لە چوارچیوەى پاکێجیگ هاوکارى سەربازى ئەمریکا ئەرا ئۆکرانیا وە بڕ 800 ملیۆن دۆلار تیەید، ک جەم هاوکاریەیل سەربازى ئەمریکا ئەرا کیێڤ لە دویاى جەنگ روسیا زیاتر لە 41 ملیار دۆلار بەرزەو کەید.

وە قسەى وەرپرسەیل ئەمریکا، واشنتۆن لە چەن رووژیگ ئایندە کلکردن هاوکارى سەربازى ئەرا ئۆکرانیا وە بڕ 1.3 ملیار دۆلار ئاشکرا کەید.

هەرچەنى جۆ بایدن سەرۆک ئەمریکا دگان وە ئەوەیا نا ک بریار کلکردن تەقەمەنى ئەرا کیێڤ بریاریگ فرە قورسە، وەلێ وەرگرى لەوە کرد ک ئۆکرانیەیل تەقەمەنى تەواویگ کەفیدە دەسیان.

لاى خوەیەوە، جاک سولیڤان راوێژکار ئاسایش نەتەوەیى ئەمریکا، وەرگرى لە دابینکردن تەقەمەنى کلاستەر کرد لەلایەن واشنتۆنەوە ئەرا ئۆکرانیا، ئەویش وە لەوەرچەوگرتن ئەوەگ بریارەگەى حکومەت ئەمریکا دروسە، ئشارەت وە ئەوەیش دا ک ئۆکرانیا گەرەنتى نویسریاگ وە وڵاتەگەى داگە وەشیوەیگ مەرزدار تەمەقەمەنى وەکار بارید وەبى ئەوەگ زەرەد وە هاووڵاتیەیل مەدەنى بڕەسنید.

بریار ئەمریکا لەبارەى کلکردن تەقەمەنى ئەرا کیێڤ لەلایەن بڕیگ لە هاوپەیمانەیل و ریکخریاگەیل ماف ئادەمیزادەوە رەتەوکریا، ئەڵمانیا ک فرانک واڵتەر شتاینمایەر سەرۆکى دەریخست ک بیجگە هەڵویست وڵاتەگەى لە رەتکردنەوەى تەقەمەنى، وەلێ نەتویەنست ریگرى لە وەردەوامبوین ئەمریکا لە هەوڵەیلى بکەید.

وەل ئەوەیشا، ریشى سوناک، سەرۆک وەزیرەیل بریتانیا ئاشکرایکرد، ک وڵاتەگەى پابەندە وە ریککەفتننامەى قەیەغەکردن تەقەمەنى. لە هەمان وەخت ئسپانیایش رەخنە لە  بڕیار کلکردن ئى چەکە گرت.

سەرۆک وەزیرەیل کەمبۆدیا لە تویتیگ داوا لە سەرۆکەیل ئەمریکا و ئۆکرانیا کرد ک بۆمب کلاستەر لە جەنگ وەکار نارن، چوینکە قوربانیى راسەقینە لەتى ئۆکرانیەیلن، وەل ئەوەیشا ئەو سەرۆک کەمبۆدییە فرە حەز کردیاد ئۆکرانیا ئەزموون ئازاربەخش وڵاتەگەى بخەیدە هویر، ک لەسەرەتاى هەفتایەیل سەدەى وەرین وە بۆمب عەنقودى ئەمریکى بۆردومان کریا، ک بویە هووکار گیانلەدەسداین و کەمئەندامکردن دەیان هەزار کەس.

لەلایگ ترەوە، سەرۆک روسیا هەڕەشە دا لەوەکارهاوردن تەقەمەنى عەنقودى، لە هەمان وەخت ئشارەت وەئەوەیش دا ک روسیا ماف خوەیە جواو بیەیدە لە ئەگەر وەکارهاوردن ئى جوورە تەقەمەنییە.

تەقەمەنى عەنقودى وەو تەقەمەنییە ناسریەید ک ئەرا بڵاوکردنەوە یا ئازادکردن تەقەمەنى لاوەکى تەقەمەنى دروسکریاگە ک هەر یەکیگیان کیشى کەمترە لە 20 کیلۆگرام، شمارەى ئەو تەقەمەنیەیلە ک لەلایەن تەقەمەنى کۆشکەوە بڵاو کریەنەوە یا ئازاد کریەن تویەنید لە چەن دەیەیگەوە بوود ئەرا زیاتر لە 600 تەقەمەنى.

مەترسى تەقەمەنى جەمەوکریاگ لەوەسە ک تەنانەت دویاى کووتاییهاتن جەنگیش چالاکەو بوود، و فرەیگ لەو تەقەمەنیەیلە ک لە وەخت وەرکەفتن نیەتەقیەنەوە، هەڕەشە لە هاووڵاتى مەدەنى کەن ئەگەر لانەوریەن و لەناو نەوریەن، ئەویش وەگوورەى ئەوەگ ریژەى شکست تەقەمەنى عەنقودى لە بارودوخ تاقیکردنەوە ها ناونى 5 ئەرا 20%، وەلێ ریژەى شکست رسەقینە لەوەخت جەنگ فرە زیاترە.

Copyright © 2017 Eshraqtv all rights reserved Created by AVESTA GROUP