(بەعس)یش شەق وەشێنی زۆر بو بەڵام…!

 

بەبێ پێشەکی یەکسەر دێمە سەرناوەرۆکی بابەتەکەم، لەسەردەمی بەعسی فاشیدا، سەددام حوسێن سوپایەک شەق وەشێن‌و شەلاتی‌و بەڵتەجی‌و بۆکس وەشێنی بۆ ئازاردان‌و کوشتن‌و لەنابردن‌و بەکۆیلەکردنی خەلکی عیراق بەگشتی‌و کوردستان بەتایبەتی پەروەردەکربو، شەق وەشینەکان هێندە زۆربون ئەگەر ناوو پلەکانیان بنوسین، پێویستمان بەنوسی چەندین کتاب دەبێت بۆیە زۆر بەکورتی دەڵێم:
 
لەسەردەمی شەق‌و بۆکس وەشێنەکانی حیزبی بەعس شتێک نەبو ناوی مافی مرۆڤ، شکۆ، ئازادی ڕادەربرین‌و خۆپیشاندان بێت، هەریەکێک دەمی بکردبایەوە شەق وەشێنەکان پەلکێشی قەسابخانەکانیان دەکردن‌و ئازارو ئەشکەنجەیان دەدان‌و خانوەکانیشیان دەروخاندن، من خۆم یەکێکم لەهەزاران خەلکی بەشمەینەتی کوردستان کە چەندینجار کەوتومەتە بەرشاڵاوی شەق‌و شێلانی بەعسییە شەق وەشێنەکان، یەکەمجار لەخۆپیشاندانەکانی قوتابیانی شاری هەولێری بەرخۆدان لەساڵانی ( ١٩٨٢ / ١٩٨٣ )دا کەوتمە بەر شەپۆڵی ڕقی بۆکسی شەق وەشێنە شەلاتییەکانی بەعس، بەدڕندەترین شێوە ئەشکەنجە درام، کە هەتا ئێستاش بەدەست ئازاری بەردەوامی جەستەم دەناڵێنم ، چونکە لە کاتی دەستگیرکردنم پربەقورگم لەتەک هاوپۆلەکانم هاوارمان دەکردو دەمانگوت : ( چیتان دەوێ ئەم جارە ، ئازادی یان سێدارە)..
 
جارێکی دیکە لەسەڵی ١٩٨٥دا شەق وەشێنەکانی بەعس پەلکێشی زیندانیانکردم، گوایە لەخێزانێکی ( موخەریبم )، لەکاتی ئەشکەنجەدانا (مولازم غەسان) کە تاسەرئێسقان دژی کورد بو پێ گوتم (گوێت لێ بێت بەچکە موخەریب، بریارمانداوە بەهەمو جۆرێک لەناوتان دەبەین، کە رۆژی ئێوەش هات، تەقسیریمان پێ مەکەن)، دوای دو ساڵ لەئازارو ئەشکەنجەدانی شەق وەشێنەکانی بەعس، ئازادکرام‌و یەکسەر خۆم ودایکە جل رەشە خێرلەخۆنەدیوەکەم‌و برا بچوکەکەم رێگای چیامان گرتەبەرو بوینە پێشمەرگە، لەساڵی ١٩٩١دا رۆژی ئێمەی قوربانیانی دەست و پۆستاڵی شەق وەشێنەکان هات، ئەوانەی شەقیان دەوەشاند ( هەندێکیان) کەوتنە بەر شەق و ڕقی خەڵکە چەوساوەکانی کوردستان‌و هەربەشەق مەحف کران، بەڵام بەشێکی زۆریش لەشەق وەشێنەکانی بەعس بەبریارێکی ئیرتجالی بەرەی کوردستانی فەرمانی لێبوردنیان بۆ دەرچو، بەتایبەت شەق وەشێنە کوردەکان ، ئێستاش بەشێکیان لەپاڵ هەردووحزبی کوردستانی ( پارتی دیموکرات و یەکێتی نیشتمانیی ) ژیانێکی شاهانە دەبەنەسەر وەک ئەوەی نەبایان دیبێت نەباران ( بەڵام خۆشبەختانە وەک جاران شەق و لوشکە ناوەشێنن) ..
 
ئەوەی جێگای داخە، دیارە کلتوری شەق وەشاندن لەبەعسەوە بۆ ئێمەمانان (قوربانیانی شەقی بەعس) ماوەتەوە، ئەدی ئەوە نییە لەهەولێر پێش چەند رۆژێک مامۆستایان کەوتنە بەر هەرەشەو پۆستاڵی شەق وەشێنەکانی دەسەلاتی بەناو کوردی، تەنها لەبەر ئەوەی داوای مافی ماندووبوونی خۆیان دەکەن‌و دەلێن ( بروخێ دز)، بەراستی کوفرە، گەورەترین تاوانە، بەلتەجییەک شەق لەمامۆستا بدات و پێی بلێت ( هیچ عەیبت نییە، درۆ دەکەیت‌و تەلەفۆنەکەیشی لێ بشکێنێت )، گەورەترین تاوانە دەسەڵاتێک کە ٢٧ ساڵە لەنەهامەتی زیاتر بۆ خەڵکی هەرێمی بەتەمای خودا هیچی تری نەبووە، کۆمەلێک شەق وەشێنی بێ سەواد بەگیانی مامۆستایان وەک گورکی هار بەربدات و ئازاریان بدات تەنها بەهۆی ئەوەی داوای سەرەتاترین مافی خۆیان (کە مووچەیە) دەکەن، باشە ئەگەر دەسەڵاتی کوردی بەراستی (دز) نەبێت بۆ بەلتەجییەکانی فێرکردووە بەشەق لەمامۆستیان و خەڵکی بەشمەینەتی کوردستان بدەن کاتی هاوار دەکەن‌و دەڵێن (بروخێ دز)، باشە ئەگەر دزنین، دەبا پێچەوانەکەیمان بۆ بسەلمێنن؟
 
بەرێزان ، ئەوەی لێرەدا زۆر زەق‌و نامۆیە ئەوەیە: لەدوای ئیهانەکردنی مامۆستایان لەلایەن بەلتەجییەکانی شاری هەولێر، لێرەولەوێ چەند بەرپرسێکی حزبی رەخەنە لەکردەوەی بەڵتەجییەکان دەگرن‌و (گوایە) ئەوانیش نارازین لەکردەوەی شەق وەشێنەکانی پارکی شانەدەر، بەڵام بەکردەوەیش خۆیان لێ بێدەنگ کردووە، ئێ ئەگەر راست دەکەن ،فەرموون ئەوە گەز ئەوە مەیدان، شەق وەشێنەکانتان تەسویرکراون‌و ناوو پیشەکانیشیان ئاشکراو دیارە، بۆ بێدەنگن لەئاست شکاندنی شکۆی مامۆستایان کە بەخواوەندی پەروەردەو مرۆڤایەتی ناوزەددەکرێن؟ باشە ئەگەر راست دەلێن بۆ ئەوشەق وەشێنانە دەستگیر ناکەن؟ بۆ داوای لێبوردن لەمامۆستایان ناکەن؟ هەتا کەی قوتی خەڵک دەدزن؟ هەتا کەی بۆکس‌و شەق دەوەشێنن؟ هەتا کەی کلتوری بەعس زیندوو ڕادەگرن؟
 
لەکۆتاییدا ئەوەندە ماوە بڵێم: دەبێت دەسەڵاتی کوردی‌و شەق وەشێن‌و شەلاتییە بندیوارەکانیان، ئەوانەی ٢٧ ساڵە شکۆی تاکی کورد دەشکێنن، دەبێت زۆر باش بزانن، ڕۆژێك دێت چارەنوسیان هەمان چارەنوسی بەعسییە شەق وەشێنەکانە بەڵام درەنگ‌و زوی هەیە.