"مەتەڵ بویشەیل".. رەسم ئەفریقیا لە ناو و دەیشت!

ئیشراق

لە هەیشت ئازار/ مارس 2016، گالیرى "1957" لە ئەکراى پایتەخت غانا کریاوە و ناو خوەى لە تاریخ سەروەخوەیى وڵاتەوە لە داگیرکارى بریتانیا هەڵگرت ئەرا زیاتر لە شەش دەیە و ئەو ناوە وەخراو نەهات، بەڵکوو هەوڵیگە ئەرا رووشنایى خستن وەبان هونەرمەندەیل غانا و خوەرئاواى ئەفریقیا وەگشتى ک بڵاوبوینە لە شوونەیل فرەیگ.

سەرجەم ئەو نمایشگایەیلە ک ریکیان خست لە ماوەى ساڵەیل گوزەیشت، لەچوارچیوەى گوزارش وە تازەگەرى هونەرى ئەفریقى هات ک نەبایەد لە ریشگ تاریخى و فەرهەنگیى جیا بکریەێد، ئمجا هەرچەنى پیشەنگەیلى لە ئەکادیمیایەیل خوەرئاوا خوەنستنە، وەلێ فرەترین دید جیاوازیگ پیشکەش کردنە ئەرا نوێنەرایەتى ناسنامەى نەتەوەیى و ئەو قەیرانەیل کۆمەڵایەتى و ئابوورییە ک لەلایەن داگیرکەرەیل ئەوروپاوە و ئەو دیکتاتۆریەتەیلە ک دەسڵات لە کشوەر ئەسمەر وەرگرتنە.

نمايشگاى"مەتەڵ بویشەیل" ك تا 9 تەممووز وەڕیەو بریەێد، ئیوارەى رووژ پەنجشەممە 26 لە لق گەلەرى لە لەندەن کریەێدەوە، ک هونەرەیلیگ هەڵوژریاى 14 هونەرمەند ئەفریقى لە نەوە و جوگرافیاى جوراوجوور گریدە خوەى. 

لە رەسمەگەى، عەنان ئاڤۆتى کەسایەتیەیلیگ لە چینەیلیگ سەر گرووپەیل جوراوجوور هەڵوژنێد و تاریخ تایبەت خوەى پیشکەش کەێد ک وەل چەن شوون و رویداگیگ دیاریکریاگ هەس، جوور ئەوەگ لە زنجیرەى "گناتا" دەرکەفێد ک لەساڵ 2020 رەسمى کردگە و روخسارەیل شمارەیگ لە دەرچگەیل" کۆلیژ هونەرى و دیزاین غاناتا" لە ئەکرا گردوێدە خوەى و تویەنستن لە جەهان هونەر سەرکەفتن وەدەس بارن و لە هەر کاریگ تاریخى وەرگرتن هونەرمەند لە کۆلیژ هویرەکارى پرووژەیل دەرچگنیان وە دیکۆمێنت بکەن.

وەلێ هونەرمەند ئەفریقیى ئەمریکى پاتریک ئالستۆن لەڕێ تابلۆیەیلەوە ک پشت وە ئەلف وباى دیالیکت ئنگلیزى بەسید و ئەمریکیەیل سیەپووس قسە وەپى کەن، گەردیدە شوون پەیوەندى ناونى رەم و حەرف و ووشەو زاراوەیل ک چیە ناو فەرهەنگ رووژانەیان و لەلایەن مۆڕاڵەیلەوە لە شار نیویۆرک نیشان دریەن، یا گوزارەیلیگ ک لەلایەن بزووتنەوەیل کۆمەڵایەتى و سياسى و بڕیگ لە رەمەزەیلیان وەکار هاوریا. 

هونەرمەند غانایى، سیرج ئەوکوەى، لە کارەیلى ماددەیلیگ جوور شیشەیل شیر و لەوحەیل چاپەمەنى و وەرگ شیشە و نەسیج و پارچە و چشتەیل تر یەرێدە کار ک هاووڵاتیەیلیان لە کار رووژانەیان تیەرنەى کار، ئەویش وەخاتر نزیکەوبوین لە واقع و فەرهەنگ و گوزارەکردن لە کیشەیل جیاجیایگ پەیوەس وە کووچ و مەسەلەى رەگەزایەتى و جەفاف.

وەل ئەوەیشا نمایشگاگە کار هونەرمەندەیل تر جوور گۆفرید دۆنکورت، جۆشوا ئۆهنبا-تاکی، یاو ئۆسو، ئەفیا پریمێ، گوستاڤۆ نازارینۆی بەرازیلی ئەفریقی، کەنی کالوکی نیامای و لاورین پیرسی ئەفریقی ئەمریکی، هەر لەیوا هونەرمەند ئەمریکیى پاکستانى نادیە وەحید ک ماوەى فرەیگ لە وڵاتەیل ئەفریقى ژیاگە، گرێدە خوەى.