تیرۆر دژ رووژنامەنویسەیل.. پەیڕەویگ "ئسرائیل" ئەرا شیوانن راسیەیل!

ئیشراق

ئسرائیل هەمیشە وە دەنگ و رەنگ هەوڵ بیدەنگکردن راسیەیل داگە، هەر لەوەر ئەوەیش وە ئەنقەز ئەو رووژنامەنویسەیلە کەیدە ئامانج ک رویماڵ ئەو جەمکوشی هیزەیلیە کەن لە دژ مللەت فلستین و لوبنان، ک تاوان دژ وە ئنسانییەتە، ک یەیش کەمترین قسەیلیگە لەبان رەفتارەیل نائنسانى داگیرکار زایۆنى.

رووژنامەنویسەیل لەوەخت رویماڵکردن جەنگ ئیسەى ناونى ئسرائیل و حەماس، و گرژیەیل بان مەرز ناونى لوبنان و فلستین داگیرکریاگ روێ وەڕوێ تەحەداى گەورە بوونەوە و هەر لەوەر ئەوەیش ژیانیان خریەیدە مەترسییەوە، یان کوشیەن، یا تویش دەسدریژى و ناڕەحەتکردن بوونەوە، یا نویسینگەیلیان تویش بۆردومانکردن بوودەوە.

 وەگوورەى راپۆرتیگ سەندیکاى رووژنامەنویسەیل فلستینى، 11 رووژنامەنویس فلستینى وە مووشەک تەیارەیل داگیرکار ئسرائیلى لە ماوەى 10 رووژ لەوەخت دەسوەپیکردن پرووسەى "تەوەفان ئەقسا" شەهید بوینە، و دەیان رووژنامەنویسیش وە شیوەیگ جیاجیا زەخمدار بوینە، و نزیکەى 50 بارەگا و ناوەند دەزگایەیل میدیایى ویران کریانە.

ماوەى ساڵەیل فرەیگە رووژنامەنویسەیل لە فلستین داگیرکریاگ تویش دەسدریژى بوونەوە لەلایەن هیزەیل داگیرکار ئسارئیلى لەوەخت رویماڵکردن رویداگەیلیگ ک روێ دەید لە ناوچەگە.

یەیش لەوەختیگە ک "ئسرائیل" وە پلەى یەکەم جەهانییە لە کوشتن رووژنامەنویسەیل و پاشیلکردن مافەیلیان، یەیش وەگوورەى بەحسیگ ک ریکخریاگ رەوتەیل ئەمریکى countercurrents ئەنجامى داگە.

جى باسە، کڵاوەیل کەو و قەڵغانەیل مقەیەتیکەر ک ووشەى رووژنامەگەرى press چاپکریاگە لەقەیانەوە، شەفاعەت نەکردگە ئەرا رووژنامەنویسەیل لە پەلامارەیل ئسرائیلى، بەڵکوو دەسڵاتەیل قەوارەى زایۆنى وە ئەنقەز دەسدریژى کەیدە بان رووژنامەنویسەیل ئەرا شاردنەوەى راسەیل، وەلێ وەل ئەوەیشا دەنگ هەق هەر وە بەرز مینید ئەرا ئاشکراکردن تاوانەیل "ئسرائیل" داگیرکەر.