"لە دڵەیل سەرقاڵید ئەى خاک باشوور".. گورانى شۆرشکارى لوبنانى چوین پەرە سەند؟

ئیشراق

ئەو گورانیەیلە ک باس لە جەنگ باشوور لوبنان کەن دژ وە ئسرائیل، شوونیگ لە وژدان لوبنان و عەرەب داگیرکردنە، ئى گورانیەیلە چوین دەس وەپى کردن؟ دویاى رزگارکردن باشوور و ئومید رزگارکردن گشت فلستین کەفتە کوو؟

وشەى "باشوور" دى وە ماناى ناوچەیگ جوگرافى لە هوشیارى عەرەب وەگشتى و مللەت لوبنان وەتایبەت نیایدن بەڵکوو هاتگە وە ماناى رویوەریگ دڵ و رووح و سووز، وە هووکار پەیوەسکردن ئى وشە وە مقاومەیگ ک وە یەکیگ لە مقاومەترین و قایمترین مقاومەیل تاریخ عەرەب دانریەید. هەر لەوەر ئەوەیش ئەڵڵاجەوى نییە ئى وشە لە دەقەیل ئەدەب و هونەر مۆدێرن لوبنانى شوونیگ وەرچەو داگیرکردگە.

گورانى مقاومە لە زگ گورانى نەتەوەیى گشتییەوە لەدایگ بویە، ک وە یەکیگ لە هەڵگرەیل کولتوور و جوانکارى مەسەلەیل نەتەوەیى دانریەید، هەرلەیوا مەسەلەیل نەتەوەیى عەرەبیش وە هەمان شیوە، وەتایبەت مەسەلەى فلستین.

برایەیل رەحبانى و فەیروز وەنرخترین و جوانترین بەرهەم هونەرى پەیوەس وەى مەسەلە پیشکەش کردنە، جوور: یافا، بیسان، رووژیگ تیەیمەو، پیەڵ هاتنەوە، زەنگەیل هاتنەوە، جادەیل قودس، و گوڵ ئەلمەدائن و گورانیەیل تر.

وەل داگیرکردن یەکەم وژەیگ لە خاکەیل باشوور لوبنان، کاردانەوەى سروشتى وەرانوەر داگیرکار دەس وەپیکرد و زیاتر گرنگى وە مەسەلەى تازەى نەتەوەیى دریا و زیاتر لە مەسەلەیل نیشتمانى، هەر لەوەر ئەوەیش گورانى مقاومەى نەتەوەیى دەس وەپیکرد.