کووچوەپیکردن زوورەملى فلستینیەیل.. کووچوەپیکردن وە کووچوەپیکردن

ئیشراق

بن غۆریون وت: "من لایەنگرى کووچوەپیکردن زوورەملى کەم، و چشتیگ نائەخلاقى لەتى نیەدوینم".. "ئسرائیل" چوین کووچ وە فلستینیەیل کرد؟ و فلستینیەیل چوین هاوکیشەى کووچوەپیکردن وە کووچوەپیکردن جیگیر کردن؟

وەرجە رووژەیلیگ، نەتەوەیل یەکگرتگ ئەوە دەرخست ک سوپاى داگیرکار ئسرائیل ئاگادارى کردگە ئەرا چووڵکردن باکوور کەرت غەزە وەتەواوى لە ماوەى 24 سەعات، و قسەکەر وەناو نەتەوەیل یەکگرتگ ستیڤان دوجاریک وت: ئى وشدارییە ماناى ئاوارەیی نزیکەى 1.1 ملیۆن کەس لە مەردم کەرتەگە ک شمارەیان 2.2 ملیۆن کەسە لە باکوور تا باشوور.

چالاکوانەیل و میدیاکارەیل فلستینى ئەو وشدارى ئسرائیلیە جوور ئاشکراکردن "جەنگ کووچوەپیکردن" و "کارەسات تازە"یگ زانستن، وەتایبەت ک رویوەر کەرت غەززە 360 کیلمەتر چوارگووش(دریژیى 41 کم و پانیەگەى ها ناونى 5 و 15 کم)، و شمارەى گەڕەکەیلى رەسیدە 18 گەڕەک.

سیاسەت کووچوەپیکردن ک داگیرکار گرتەسەى وەر تازە نییە لەبانى، دەیڤید بن غۆریون لە ساڵ 1938 ئەرا لیژنەى جیوەجیکار ئاژانس یەهوودى وت: "من لایەنگرى کووچوەپیکردن زوورەملى کەم، و چشتیگ نائەخلاقى لەتى نیەدوینم".

لەیرا مقاومەى فلستینى لە میانەى "تەوەفان ئەقسا" ئاشکراى ئەوە کرد ک دەس کەیدە هاومیشەى "کووچوەپیکردن وە کووچوەپیکردن"، و دەس کەیدە دەسوەشانن عەسقەلان ئەرا کووچوەپیکردن نیشتەجیکریاگەیل لەتى، ئەویش جوور یەکەمین گامیگ وەرجە دەسکردن وە کووچوەپیکردن نیشتەجیکریاگەیل دویاى عەسقەلان.

لە بەیاننامەیگ مقاومە، قسەکەر سەربازى وەناو "کەتیبەیل ئەلقەسان" ئەبو عوبەیدە وت: "ئەگەر داگیرکار واز لە سیاسەت کووچوەپیکردن مەدەنیەیل نارید، ئەوە کەتیبەیل دەس کەنە دەسوەشانن لە شار عەسقەلان تا کووچوەپیکردن مەردمەگەى وەتەواوى، و دویاخریش جیواز بوود ئەرا کووچوەپیکردن شاریگ تر جوور وەرپەرچدانەوە لەبان تاوانەیل کووچوەپیکردن دەرهەق وە مەدەنیەیل.