گەشت دەزگایەیل بڵاوکردنەوە لەعیراق.. سەختی و مەرامەیل لەساى گویڕانکاریەیل رووشنهویرى و تەکنۆلۆجى

ئیشراق

گەشت دەزگایەیل چاپ و بڵاوکردنەوە لە عیراق... سەختیەیل و ئامانجەیل لەساى گۆێڕنکاریەیل رووشنهویرى و تەکنۆلۆجى.

دویاى رووژیگ جیاواز، دەروازەیل بەغداى پایتەخت عیراق واز کریەید ئەرا پیشوازیکردن لە هەزاران کتاو و کتاوەیل ئەدەبى، ئەویش لە پیشانگاى ناودەوڵەتى بەغدا ئەرا کتاو، و ئى پیشانگایشە تا بیس و هەفت سپتەمبەر دریژە دیرید.

ئى چالاکییە جیاوازە، ئەویش وە بەشدارى شمارەى فرەیگ لە میوانەیل دیارى ک ئاهەنگ وە کتاو قاقەزى سازکەن، ک سەربار پەیابوین سەردەم ئەلکترۆنى و زاڵبوین ئاسمان شمارەیى، دەزگایەیل بڵاوکردنەوەى عیراقى تویش ململانى تیەن ئەرا مەندنەوە و وەردەوامبوین.

بەعزیگ لە دەزگایەیل بڵاوکردنەوە مکوڵان لەبان وەرگرتن ریگەى سەرکەفتن لە ئاسمان ئەدەب عەرەبى و جەهانى.

لەى باوەتیشەوە بڵاوکەر و نویسەر عیراقى ئەمیر عەلى وت: هووکارەیل فرەیگ هەن بویەنە بایس پاشگەزبوینەوەى دەزگایەیل بڵاوکردنەوە و لەوانەیش نەوین پشتگیرى حکومى ئەرا کەرت بڵاوکردنەوە و کتاو و نەوین چەودیرى لەبان داناین کتاو ک گشت ئەیانە بویە هووکار بڵاوکردنەوەى فکرەیل و کتاوەیل خراویگ.

باس لەوەیش کرد، بەعزى لە دەزگایەیل بڵاوکردنەوە لەیوا مامڵە وەل کتاوا کەید جوور ئەوەگ بویشید ک موڵک خوەیانە وەل بەرهەمەیلى.

عەلى باوەڕى ئەوەسە ک جیوازى هەیش لەناونى دەزگایەیل جەهانى و عەرەبى و دەزگایەیل عیراقى، هەر لەوەر ئەوەیش زوورم دەزگایەیل بڵاوکردنەوەى عیراقى نیەتویەنن رکابەرى دەزگایەیل جەهانى و عەرەبى بکەن لەوەر هووکارەیلیگ و لەوانەیش ستراتیجییەت هەڵە لە دروسکردن دەزگاى بڵاوکردنەوە.