وتەى سودانى.. خوەنینەوە لەناونى رستەیل و ئاهیگ ئەرا ئەوەگ لە سینەیلە

ئیشراق

 سەرۆک وەزیرەیل محەمەد شیاع سودانى وتاریگ خوەنیەوە لە کارەیل قمەى ئاشتى قاهرە 2023، و باس لە بارودوخ کارەساتباریگ کرد ک مەردم غەزە لەتى ژیەن لە ئەنجام دەسدریژیەیل  زایۆنى و جەخت لە نەگووڕى هەڵویست عیراقى کرد وەرانوەر کیشەى فلستین و پشتگیریکردن لەلى و قسەیگیش لە ئاشووگەرەیل و سەرشووڕەیل وەشان و خاڵ نا بان پیتەیلەوە لە دویاین پیشهاتەیل هەرێمى.

سەرۆک ئەنجومەن وەزیرەیل وت: ئەرا گشت وژانیگ زینگ.. دى وەختى ناتگە؟

بەڵى ئەیە قسەى سەرۆک وەزیرەیل وە ئازایەتى و ئاشکرا وەبى پیچ و پەنا یا نیفاقیگ وەڕوێ خریاگ ئەرا بان گشت وژانیگ زینگ وەل زنجیرە پرسیارەیلیگ ک تازە نیین و زایڵەى هیمان ها وژدان گشت  ئادەمیزادیگ ئازاد، وەبى ئەوەگ جواوەیل ئاشکرایگ وەربگرید لە بەعزیگ لە خاوەن سەروەرى پیلانچى.

لە ئشارەتیگیش ئەرا ئەوەگ سودانى وتەى سەبارەت وە پاشیلکردن یاسایەیل ناودەوڵەتى، ئەوە دەرخست و وت: چەودیرى ئى داخە کەیم، چوینکە ئیمە رەسیمنە رووژگاریگ بریارەیل ناودەوڵەتى لەتى پاشیل کریەید وەگشت رویدارییگەوە و لەوەرچەو گشت جەهان ک سەرکردەیلیگ وەگشت تویڕەییگەوە وەرگرى لە قەوارەى زایۆنى داگیرکار کەن ک یاسای ئنسانى پاشیل کردگە و گووش وە قوربانیەیل مللەت فلستینى نیەن ک خوینى رشیەید وەبى تاوان، و بەڵکوو لەوەیش زیاتر بەشدارى تاوانباریش کەن لە تاوانەگەى.