شێخ خەزعەلی: گرنگی نەفوەرگرتن لە شارەزایی ژاپۆن لە رەسین وە گەشەسەندن ئابووری

ئیشراق

ئەمیندار گشتى بزووتنەوەى عەسایب ئەهل هەق شێخ قەیس خەزعەلى، ئمڕوو یەکشەممە، وەل سەفیر ژاپۆنى لە عیراق فۆتۆشى ماتسوموتو، چەنن باوەتیگ ناوچەیى و هەرێمى باسکرد.

وەگوورەى بەیاننامەى نویسینگەى ئعلامى ئەمیندار گشتى عەسایب ئەهل هەق، شێخ خەزعەلى لە نویسینگەى خوەى پیشوازیکرد لە ماتسوموتو، و وەلیا باس لە پەیوەندیەیل دولایەنى ناونى هەردوگ وڵات و دویاین پیشهاتەیل بارودوخ سیاسى لە عیراق و ناوچەگە کرد.

هەر لەو دیدارە شێخ خەزعەلى وەل سەفیر ژاپۆن باس لە بارودەخ ناوچەگە، و دویاین پیشهاتەیل لە غەززە، و دەرئەنجام بۆردومانەیل وەردەوام زایۆنى کرد ک هەزاران و شەهید و زەخمدار لەلى کەفتەوە، و خواست رەسانن دەرمان و هەوەجەیل پزیشکى و دەسمیەتەیل خواست ئەرا غەززە وەبى هویچ مەرجەیلیگ پیشوەختە، و بایەسە ژاپۆنیش هەڵویستیگ ئاشکرا نیشان بیەید لەبارەى ئەوەگ روێ دەید لەناو خاکەیل فلستینى، و کومەڵگاى ناودەوڵەتییش دەور خوەى بیاشتوود ئەرا وساننەوەى تاوانەیل لەناوبردن وەجەم ک تیەیدە تویش مللەت فلستینى.

جى باسە، شێخ خەعەلى، جەختیش کردەوە لەبان گرنگى نەفوەرگرتن لە شارەزایى ژاپۆنى لە گەشەداین وە ئابوورى لە عیراق، و وت: عیراق خاوەن توانایەیل هەڵسانەوەى گشتگیرە و هەوەجە وە پشتیوانى کۆمەڵگاى ناودەوڵەتى دیرید ئەرا پەرینەوە لە سەختیەیلیگ ک حکومەت عیراقى خەریکە زاڵ بوود لەبانى.