سەرۆک وەزیرەیل و ماکرۆن: ئاگربەس لە غەززە خواستە

ئیشراق

سەرۆک ئەنجومەن وەزیرەیل محەمەد شیاع سوانى، ئمڕوو یەکشەممە، پەیوەندییگ تەلەفۆنى لە سەرۆک فرەنسى ئیمانۆیل ماکرۆن وەپى رەسى.

پەیوەندییگە دقەت کرد لەبان تاوتویکردن پیشهاتەیل گورج لە ناوچەگە، و رویداگەیل مەترسیدار لەناو خاکەیل داگیرکریاگ فلستینى وە هووکار وەردەوامى دەسدریژیەیل دەسڵات داگیرکار زایۆنى ئەرا بان مەدەنیەیل لە کەرت غەززە، و گرنگى وەردەوامى هەوڵەیل لەوەر دوینستنەوەى چارەسەر ئەرا ئەوەگ روێ دەید.

هەر لەو پەیوەندى تەلەفۆنییە جەخت کریا لەبان ئەوەگ وەردەوامى بەرزبوینەوەى رویداگەیل دەرئەنجامەیل مەترسیداریگ لەلى کەفیدەوە ئەرا بان ئاشتى و ئاسایش هەرێمى و ناودەوڵەتى، و ریککەفتن لەبان دریژەداین وە وەردەوامى و هەوڵەیل هاوبەش ئەرا وساننەوەى جەنگ و لەخوەیگرتن ململانى وەخاتر رەسین ئەرا چارەسەر گشتیگیر و دادپەروەرانە.

سەرۆک وەزیرەیل جەخت کرد لەبان ئەوەگ قەیرانەگە لە هەفت تەشرین یەکەم ئى مانگە دەس وەپى نەکردگە، بەڵکوو قویلترە لەوەو دریژەو بوود ئەرا دەیان ساڵ لە پابەندنەوین وە یاسایەیل و شەرعییەت ناودەوڵەتى لەلایەن دەسڵاتەیل داگیرکار ک ک مللەتیگ وە تەواوەتى خستە زیندان وەبى تاوان، و یەیش هەستیگ سەرسەخت ستەم و نادادپەروەرى لەلى کەفتەوە لەناو و لەدەیشت فلستین.

لاى خوەیەوە، سەرۆک فرەنسا ئشارەت وە خواست کار جددى کرد ئەرا ریگریکردن لە فراوانبوین ململانیەیل، و رزگارکردن مەردم مەدەنى لە دەرئەنجامەیل ئەو پیشهاتەیلە ک رویدەن.