سەرۆك وەزیرەیل لە قمەى قاهیرە: عیراق وە تونی هەوڵەیل چووڵكردن كەرت غەززە لە مەردمەگەى رەتەوکەید

ئیشراق

سەرۆك ئەنجومەن وەزیرەیل محەمەد شیاع سودانى، ئمڕوو شەممە ، عیراق لە پیشکەشکردن ئەگەرەیل هەر جوورە هاوکارییگ ئەرا کەرت غەززە دویا نیەکەفید، و داوایش کرد سەندووقیگ دامەزریەید ئەرا پشتیوانى و ئاوەدانکردنەوەى کەرتەگە.   

وەگوورەى بەیاننامەى نویسینگەى ئعلامى سەرۆک وەزیرەیل، محەمەد شیاع سودانى سەرۆک  وەزیرەیل لە وتارەگەى لە قمەى ئاشتیى قاهیرەى 2023 وت: مللەت فلستین وە ئامانجگرتن مەردم مەدەنى لە کەمپەیل نیشتەجیبوین و کەنیسە و نەخوەشخانەیل خریەنە ژیر پرووسەیگ جینۆسایدەوە، وە ئشارەداین وە ئەوەگ "جەمکوشى نەخوەشخانەى مەعمدانیە روخسار راسەقینەى داگیرکارى زایۆنى و مەرامەیلى دەرخست ک گشت خەتەیل قرمزیگ پەزان".

ئشارەت وەیەیش کرد، ئەوەگ روێ دەید تاوانیگ تەواو جەنگە، ک وەکوشتن مەردم بیتاوان و چەسپانن ئابڵوقەى خنکاننلەبان ئەوەگ لە ژیانیان مەندەسەوە دەسوەپیکرد. ک زەحمەتە وە وشە وینا بکریەید ک رووژانە چە روێ دەید لە دڕندایەتى و جەمکوشى و وەخاکسپاردن بیتاوانەیل لەژیر ویرانەى ماڵەیلیان لەبان خاک یەکەم نیشتەجیبوینیان لە رووژەیل نەکبە لە ساڵ 1948.

جەخت لەوەیش کرد، ئمڕوو غەززە تاقیکردنەوەی تازەیگ ئەرا سیستەم جەهانى پیک تیەرید، ک چەنەها جار لە جیوەجیکردن بەهایەیل ئنسانى و دادپەروەرى و ئازادى شکست هاوردگە ک داواى کەید، فلستینیش شایەتحاڵ زینگە ئەرا ئى شکستە، و باس لەوەیش کرد "وەخت ئەوە هاتگە کووتایى وەى داگیرکارى پڕ کینەتە باریەید، و ئازارەیل مللەت فلستین بووسنریەنەوە".

جى باسە، سەرۆک وەزیرەیل هەمیش وت: ئەگەر ریز لە بریارنامەیل ناودەوڵەتى بگیریاتاد، و دەزگایەیل ناودەوڵەتى وەرپرسیارێتى خوەیان بگردیانە مل، ئەوە مەسەلەى فلستین نەڕەسیە ئى بارودوخ کارەساتبارە، عیراق وە تونى هەوڵەیل چووڵکردن کەرت غەززە لە مەردمەگەى رەتەو کەید، و هویچ بواریگ نییە ئەرا چووڵکردن کەرت غەززە.