حزب دەعوەى ئسلامى داوا لە عیراقیەیل کەید بچنە هاناى برایەیل فلستینییان

ئیشراق

ئەمیندار گشتى حزب دەعوەى ئسلامى نورى مالکی، جەخت لەوە کرد تەوەفان ئەقسا پرووسەیگ قارەمانێتییە ک قارەمانەیل فلستین ئەنجامى دەن وە پشتگیرى هەڵویستەیل شەرفەمەند لە مللەت عەرەبییەوە، و داوایش لە گشت عیراقیەیل کرد ئامادە بوون ئەرا وەهاناڕەسین برایەیلیان و گشت جوورە پشتگیرییگ پیشکەش بکەن.

مالکى جەخت لەوەیش کرد  رووژ هەفتەم لە ئوکتۆبەر لە رووژەیل گەوراى خوداوەندە ک وە نەمرى مینیدەوە لە یادوەرى شەرەفدارەیل لە جەهان و رووژەیل دویاتر جوور وەرجە خوەى نییە، و ئەوەگ جیهادکارەیل ئەنجامى دەن لە تەوەفان ئەقسا ئومید خستەسە دڵ گشت ئازادیخوازەیل لە جەهان.

جى باسە، مالکى هەمیش وت: ئەوەک ئمڕوو گرنگە، هەڵویست برایەیل موسڵمان و عەرەبمانن و بایەسە لەبانیان شان وەشان برایەیل فلستنییان و مافەیل پیرووز بوسیەن و داوایش لە ئەو دەوڵەتەیل عەرەبیە کرد ک پەیماننامەى ئاشتى و ریککەفتنەیل ئاساییبوینەوە دیرن سەفیرەیل زایۆنى لە پایتەخت وڵاتەیلیان قاو بیەن.