سەید سیستانى: داوا لەجەهان کریەید لە روێئى دڕندەیى ترسناکە بوسیەن و ریگرى لە پلان هیزەیل داگیرکار بکەن

ئیشراق

نویسینگەى مەرجەع باڵاى ئایینى سەید عەلى سیستانى، بەیاننامەیگ سەبارەت وە ئەوەگ هاتەسە بان کەرت غەززە بڵاوکردەوە و ئشارەت وە ئەوەیش کرد، کووتاییهاوردن وە تراژیدیاى فەلەستین و لاوردن داگیرکار تەنیا ریگەس ئەرا بەرقەرارکردن ئاسایش و ئاشتى.

نویسینگەگە لە بەیاننامەگە وت: لەى رووژەیلە کەرت غەززە روێ وەڕوێ بۆردومان وەردەوام و پەلامار فراوان بى وینە بویەسەوە و تائیسە زیاتر لە شەش هەزار هاووڵاتى مەدەنى بیتاوان شەهید و زەخمدار بوینە، و بویەسە هووکار ئاوارەبوین شمارەی فرەیگیان لە ماڵەیلیان، و هەرلەیوا ویرانبوین ناوچەى نیشتەجیبوین گەورا.

باس لەوەیش کرد، بۆردومانکردنەگان ناوچەیل جیاجیا کەنە ئامانج لە وەختیگ ک دى هویچ شوونیگ مقەیەتیکریاگ ئەرا مەردم نییە ئەرا پەناگە، و لە هەمان وەخت سوپاى داگیرکار ئابڵوقەیگ خنکنەر لەبان کەرت غەززە چەسپنید ک لەى دویاخرە ئاو و خوەراک و دەرمان و هەوەجەیل تر ژیانیش لەخوەى گرتگە، یەیش گەوراترین زەرەد وەو مەردمانە رەسانەگە ک بى دەسڵاتن، جوور ئەوەگ بتواید تووڵە لەلیان بکەیدەوە و قەرەبوو شکستە گەوراگەى لە روێ وەڕوێ بوینەوەیل ئى دویاخرە بکەیدەوە.

جەختیشکردەوە، ئەوەگ وەتەواوى لە دید گشت جەهانەوە روێ دەید و هویچ ریگرى و وەربەسیگ نییە، وەلێ کەسەیلیگ هەن ک پشتگیرى لەو کردەوەیل تاوانکارییە کەن و مەهانەى ئەوە تیەرنەوە ک وەرگرى لەخودکردنە.

وتیش، داوا لەگشت گشت جەهان کەن لە وەرانوەر ئى دڕندەیى ترسناکە بوسیەن و ریگرى بکەن لەوەگ هیزەیل داگیرکەر پلانەیلیان جیوەجى نەکەن.