وەکاربەرەیل فەیسبووک و ئینستاگرام تویەنن مانگانە پویل بیەن

ئیشراق

کۆمەڵەى میتا وە نیازە بەشداریکردنى پویلى پیشکەش وە ئەوروپیەیل بکەید ئەرا وەکاربردن هەردوگ سەکوو " فەیسبووک" و "ئینستاگرام" وەبى ریکلام، و دویاتریش پابەندبوین وە یاسایەیل ئەوروپایى پەیوەس وە داتایەیل کەسى و ریکلامەیل ئامانجدار، جوور ئەوەگ سەرچەوەیگ ئاگادار لە باوەتەگە باس لەلى کردگە.

وەگوورەى ئەو زانیاریەیلە ک ئەرا یەکەمجار رووژنامەى "وۆڵ ستریت جۆرناڵ (WSJ) لە رووژ سێشەممە ئاشکراى کردگە، میتا کار لەبان خستنەڕوێ شەن شیوازەیلیگ کەید ئەرا بەشداربوین.

هەر وەگوورەى زانیاریەیل، بەشداربویەیل تویەنن مانگانە نزیکەى 10 یۆرۆ بیەن ئەرا ئەکاونت ئینستاگرام یا فەیسبووک لە کۆمپیتەرەیلیانەوە، هەرلەیوا 13 یۆرۆ ئەرا ئەپڵیکەیشن مۆبایل، و هەر ئەکاونتیگ زیایە نزیکەى 6 یۆرۆ زیاى کەید ئەرا پویل مانگانەیان.