زە ئیکۆنۆمیست: شایەد ئاساییبوینەوەى سعودى ئسرائیلى کاریگەرى بیاشوود لەبان روخسار خوەرهەڵات ناوڕاس

ئیشراق

گۆڤار "زە ئیکۆنۆمیست" ئەمریکی ئشارەت وە ئەوە کەید لە دویاى دەسوەکاربوینى وەلاى کەمەوە جاریگ چەوى وە سەرۆک وەزیرەیل داگیرکار کەفتگە.

ئەو لە راپۆرتیگ ک ماڵپەڕ "ئەلخەنادق" تەرجومەى کردگە ئویشید: ناڕووشنایى محەمەد بن سەلمان سەبارەت وە مافەیل فلستین دگان وەپیا ناینە وە کیشەیل ناوخوەیى نەتانیاهۆ.

ئمجا سەربار هاندەرە گەوراگەى سێ لایەنەگە ئەرا سەرخستن ریککەفتنەگە و یەیش شایەد زوور راسەقینەس، وەلێ گۆڤارەگە لە زووان نەتانیاهۆوە ئویشید، ئەگەر لە چەن مانگیگ ئایندە ئەوە ناریمنە دەس، شایەد ئەرا چەن ساڵیگ دویاى بخەیم.

پەیوەندییەیل دبلۆماسى فەرمیى ناونى سعودیە، دەوڵەمەنترین و کاریگەرترین وڵات عەرەبى و ئسرائیل، دەوڵەت یەهوودى ک لە زوییەوە لەلایەن شانشین سعودییەوە دویرەو کەفتگە، ماوەى فرەیگە وجوود دیرید.  

  محەممەد بن سەلمان لە ساڵ ٢٠١٧ەوە ک بویەسە شازادەی جینشین، وەى کەمەوە یەک دانیشتن نهێنى وەل نەتانیاهۆ ئەنجام داگە, و هەردوگ وڵات رکابەریگ هاوبەش لە ئیران دیرن و وەبیدەنگى مامڵەى بازرگانى کردنە، وەلێ لەساڵ 2020 ریککەفتن ئاساییکردنەوە لەناونى ئسرائیل و چەن وڵاتیگ عەرەبى ئمزا کریا، وەبى ئەوەگ سعودیە بوود.

کەم کەس چەوەڕى ئەوە کردیاد پەیوەندیەیل ئسرائیل و سعودیە لە ماوەى ژیان شا سەلمان وە فەرمى بکریەن، ک سەر وە نەوەیگە ک هەر پەیوەندییگ وەل ئسرائیل ئەڕایان هویر لەلى نەکریاوە.

وەلێ هانداین ئەرا رەسین وە ریککەفتن چڕتر بوینەسەوە. وەتایبەت ئەرا سعودیەیل پاڵنەرەگە هاوپەیمانییگ ستراتیجى تازەس وەل ئەمریکا. هەردوگ وڵات پەیوەندییگ ئەمنى دیرن، وەلى شانشین یەکگرتگ خوازیار ریککەفتنیگ فەرمیترە ئەرا وەرگریکردن، کەمترینیان لەوەر ئەوەگ بەرنامە ئەتۆمییە وەرفراوانەگەى ئیران وەو ماناسە ک ئیسە لە وەربەس خاوەندارێتى چەک ئەتۆمییە، یەیش هاوسەنگى ئەمنیى ناوچەگە ویران کەید.